ЭМ КӦ ШОГ — ЭМ И МОГСизим во нин война кыссьӧ, Пӧсь вир киссьӧ. Озыр сувтіс гӧльлы паныд, Война паніс. Муыс тырӧ синва шорӧн, Ыджыд шогӧн. Эмбур чинӧ крестьяналӧн, Сьӧкыд налы. Медбур — верстьӧ йӧзыс ылын, Война вылын; Гӧль йӧз вӧсна найӧ сэні Сулалӧны, — Гӧль йӧз вӧсна, миян вӧсна, Вӧля вӧсна. Дыр ми олім дзескыд кытшын, — Би чеп пытшкын: Колчак воліс асыввывсянь, — Оз нин кывсьы; Лунсянь воліс сар Деникин, — Абу некӧн; Вой тӧв вайліс лёк Орловӧс, — Эз ну ловсӧ; Уна врагӧс гӧрд рос чышкис Роч му пытшкысь. Мукӧдъяскӧд артмим бурӧн — Бурӧн-мирӧн. Миян ӧні ӧтик враг эм — Барон Врангель; Лунвыв сарство кӧсйӧ восьтны, Эмбур босьтны. Огӧ сетӧ сылы олӧм, — Вины колӧ! Гӧль йӧз пиян — гӧрд салдатъяс, Вокъяс, батьяс! Ставныд сувтӧй Врангель воча — Пусь-пась вӧчӧй!.. Сэки кутам бура овны, — Оз ло повны; Сэки эмбур кутас содны — Ӧдйӧ содны... Ещӧ менам ыджыд мог эм, Сё ен могӧн! Кынмысьяслы окоп пытшкӧ — Паськӧм ыстӧ! Кӧдзыд тӧлын энӧ кынтӧ — Водзӧс мынтӧ! Шонтӧй налысь, муса вокъяс, Кияс-кокъяс!
