ГУДРАСЬӦМ

Гуся тӧвар Машӧ нуӧ.
— Ветлӧ ӧдйӧ! — сійӧ шуӧ, —
Перативыд йӧзӧн тырӧ,
Мича тӧвар ставыс бырӧ.
	Аттӧ, дивӧ,
	Аттӧ, дивӧ.
Коді бӧрдӧ, коді сьылӧ,
Пельтӧм Мишлӧн гӧлӧс кылӧ:
— Гургы, гургы, сӧкъя тшаксӧ!
— Татчӧ, татчӧ, — йӧзыс баксӧ.
	Аттӧ, дивӧ,
	Аттӧ, дивӧ.
Дона тӧвар донтӧг петӧ,
Ызгысь йӧзлӧн дуль-ва петӧ,
Ставыс равзӧ, гымгӧ-зытшкӧ,
Пиньсӧ йирӧ — пырӧ пытшкӧ.
	Аттӧ, дивӧ,
	Аттӧ, дивӧ.
Пельтӧм Мишӧ кулак лэптіс,
Ӧтик-мӧдлысь рушку ректіс,
Чуш-чаш вартіс, пома гартіс,
Регыд сылӧн делӧ артмис.
	Аттӧ, дивӧ,
	Аттӧ, дивӧ.
Сэк тай йӧзлӧн синъяс воссис,
Сэк тай йӧзыд яра босьтчис:
Гиля-голя ӧшинь киссис,
Ӧдзӧс пыдди — выль туй письтіс.
	Аттӧ, дивӧ,
	Аттӧ, дивӧ.
Рушку вылын муртса тӧрим,
Мӧда-мӧдлысь ныр-вом гӧрим.
Водзӧ-бӧрӧ жуам шӧрын —
Корсям мича дӧрӧм дӧра.
	Аттӧ, дивӧ,
	Аттӧ, дивӧ.
— Ура! Босьтлы, кодлы сюрӧ!
— Ойя, кодкӧ пельӧс пурӧ!
— Аттӧ, поті менам юрӧй!
— Лешак чукӧр, энӧ дурӧй!
	Аттӧ, дивӧ,
	Аттӧ, дивӧ.
Ставыс тӧдса: тонӧ батьӧ,
Тонӧ Катя, Кирӧ Татьӧ,
Сопрон Васька, Падьӧй Надьӧ,
Ӧдя сваття, Пиля дядьӧ.
	Аттӧ, дивӧ,
	Аттӧ, дивӧ.
Уна тӧвар гортӧ воис, —
Абу тай нӧ бобрик нойыс?
Мужик менӧ менӧ сэтчӧ сёйис:
— Лешак ӧмӧй тэнӧ тойис?
	Аттӧ, дивӧ,
	Аттӧ, дивӧ.
— Бурджык бруки менам шӧрав,
Плеша Латкин мед оз серав,
Да мед бара шыр оз керав,
Ачыд тӧдан, мый сэк кера!
	Аттӧ, дивӧ,
	Аттӧ, дивӧ.
Шӧрасим да шӧрасим,
Вурасим да вурасим,
Тэрмасим да тэрмасим,
Быдӧн емъяс чегъялім.
	Аттӧ, дивӧ,
	Аттӧ, дивӧ.
Коркӧ Машӧ вӧтӧн аддзӧ:
Педя Педӧр локтӧ даддя,
Бобрик гача, ёкмыль нуӧ:
— Аттӧ, дивӧ! — Машӧ шуӧ.
	Аттӧ, дивӧ,
	Аттӧ, дивӧ.
— Кыдз нӧ тэныд тайӧ воис
Менам мича бобрик нойыс?
Вайтӧ ветлам матӧ, татчӧ,
Муса барин, пӧрччы гачтӧ!
	Аттӧ, дивӧ,
	Аттӧ, дивӧ.