КОМИ ГӦЛӦС ЫЛІ МУСЯНЬ

Сибырсянь газет лэдзан (редакция) ним вылӧ воис со кутшӧм гижӧд.

Быд праздник рытӧ ме ордӧ локтӧны мужикъяс, бабаяс да челядьяс, тшӧктӧны лыддьыны коми гижӧд. Ме унаысь налы лыддьывлі комиӧн “Удж” газетысь. Мукӧдторйыс зэв тешкодь налы кажитчас. Ас кывъя гижӧдтӧ ставныс зэв сьӧлӧмысь кывзӧны. Лыддьӧм бӧрас мукӧддырйиыс кодсюрӧ зэв сьӧкыда лолыштасны да шуасны: “Коркӧ эськӧ-й ми вӧвлім тшӧтш ӧти семьяысь да. Миянлы век на зэв муса ас коми кывйыд, эгӧ на сійӧс вунӧдӧ, кӧть ми важӧн нин торйӧдчылім наысь (гашкӧ сё воысь нин унджык) да олам роч да тотара пӧвстын”.

Зэв эськӧ коми кывтӧ став коми йӧзыс тані радейтӧны, да сӧмын нинӧм вылысь лыддьыны: некутшӧм коми книга абу. Талун лыдди налы 1-й нумер газет “Югыд туй”.

Ми тані коми уджалысь йӧз кутам вочасӧн ордымасьны югыд туй вылӧ петны. Миян ыджыд надея: Коми автономия отсалас миянлы тшӧтш югыд туй вылӧ сувтны.

Кӧть тані век на коми кыв рочьяслы серам туйын олӧ — ми ас коми кывйысь огӧ яндысьӧ, огӧ полӧ.

Мед жӧ олас Коми Республика!

Мед лоӧ югыд туй коми уджалысь йӧзлы!

Сибырса Коми М. В. Никулин.

С. Ивановское, Ялуторовск. уезда