ПЕТУК ВАСЬӦ

Лунтыр Васьӧ петукасьӧ.
Машӧ чойлысь мырддис чача.
Мишӧ воклысь небӧг — дзаж!
Петкӧдла пӧ тіян гаж.

Сэсся петіс ывла вылӧ.
Кысук куйлӧ кильчӧ вылын.
Васьӧ каньлы бокас — клён!
Видзӧдлӧй пӧ, кутшӧм ён.

«Мый нӧ эськӧ сэсся вӧчны?
Пыра йӧрӧ Пекла пӧчлы.
Сэн морковыс быдмӧ — сук.
Нетшка нӧшта курыд лук.

Курыд лукнас чойӧс верда,
Мед оз пысась быдтор бердӧ.
А морковсӧ ачым — ам!
Со ӧд кутшӧм менам сям».

Другысь йӧрысь петіс петук.
«Ку-ка-ре-ку! Ку-ка-ре-ку!»
Лэптіс ассьыс югыд сорс:
«Тэкӧд некоді оз ворс!

Некод вӧлӧсьтӧ оз горӧд.
Сулав тані потшӧс дорад».
Сэсся нырнас Васьлы — колс!
«Ӧні мун да ӧтнад ворс!».

Васьлӧн синва петӧ шорӧн.
Петукыдлысь прӧща корӧ.
Доймӧм коксӧ ниртӧ — ой!
Ёна жӧ нин дойман дой.

«Менсьым прӧща оз ков корны.
Тэ ӧд Машӧ чойтӧ дорйысь.
Мишӧ воккӧд мун да ворс».
Лэдзис петук ассьыс сорс.

Васьлы оз ков шуны кыкысь.
Ӧдйӧ дугдіс потшӧс пыкны.
Тӧвзис гортас быттьӧ ньӧв,
Быттьӧ тані эз и вӧв.

Машӧ чойлысь синва чышкис,
Каньӧс малалыштіс мышкӧд.
Мишӧ воклы шуис: «Вок,
Сэсся тадзтӧ некор ог».

Петук йӧрын ветлӧ тшапа.
Кысук нюлӧ ассьыс лапа.
Чипан пиян — кот-кот-кот.
Шань жӧ миян Васьӧ морт.