БАБА ГОЖӦМ

Помасьлытӧм зэръясыс
Киссисны и кобисны,
Енэж шӧрӧ вашмунӧма шонді.
Мыйла талун сынӧдыс
Крепыд сур моз коддзӧдӧ?
Ме и збыльысь
Гажмыштыны понді.
Кокъяс улӧ пуясыс
Шыблалӧны зарнисӧ...
Коркӧ меным
Козьналін тэ чусі.
Ныв-зонмыс рытсёрӧдз
Ветлӧдлӧны параӧн,
Но, а миян тэкӧд
Муслун кусі.
Петавлы, петавлы
Шаньмӧм арся ывлаас.
Сэні талун
Гожъялыштны позьӧ...
Тэам кӧ, кажитчӧ,
Вунӧдчан и сывъялан...
Воис дивӧ пӧра —
Баба гожӧм.