* * *

Тэ пукалышт, нылукӧй, ещӧ,
Эн тэрмась тэ гортад, эн мун.
Ми аддзылам, войыс кыдз вешйӧ,
И чужӧ кыдз зэв мича лун.

Ми аддзылам, шонді кыдз петӧ
Да мичмӧдӧ юсӧ и сикт,
Оз жалит, став шоныдсӧ сетӧ,
Ми велӧдчам сы моз жӧ дзик.

Ми кывлам, кыдз керкаяс сайын
Веж турунӧн кышӧдчӧ тӧв.
И миянлы асылыс тайӧ
Друг мусаӧн лоӧ сё пӧв.

Тэ пукалышт, нылукӧй, ещӧ,
Эн тэрмась тэ гортад, эн мун.
Ми аддзылам, войыс кыдз вешйӧ,
И чужӧ кыдз зэв мича лун.