ПАРМАЫН

Ме ветлӧдлі парматі-вӧрті,
И компастӧг сэні ог вош.
Ме тӧда, кыт ветлӧдлӧ йӧра,
Кӧн пиянсӧ велӧдӧ ош.

Ме туланлысь кок туйсӧ аддза
И кывла, кыдз гажъялӧ койт...
И дум вылӧ оз волы паччӧр,
Кӧть пармаын суас сьӧд вой.

Кӧть овлывлӧ сьӧкыд — ог скӧрав,
И мӧд вылӧ ог вешты лӧг...
Быд лэбачкӧд шыася вӧрас,
Кузь нэм меным туналас кӧк.

Ог кор аслым сюрс воа олӧм.
Ме ассьым кӧ ола — зэв шань.
А пармалы вот эськӧ колӧ
Сюрс воясӧн сулавны тан.