* * *

А сэні, юлӧн мӧдлапӧлас,
Посёлок — ӧткодь керка чукӧр.
Оз меным кодкӧ кинас ӧлась,
Но мыйла сьӧлӧмӧдзӧ тшукӧ?

Ме коркӧ сэтысь тэрмасьӧмӧн
Шуд корсьны
Ӧдӧбті да муні.
И ӧні гӧгӧрвои сӧмын,
Мый кодкӧ доймис тайӧ лунӧ.

А коді? Дзоридз? Пу ли? Ныв ли?
Та серти паметь — пемыд гуын...
А Мозын оз и сувтлы, кывтӧ —
И шогсӧ-гажсӧ — ставсӧ нуӧ.

Ме ӧти мӧвпӧн талун кӧвтча,
Мый шудлун суны абу сёр на.
И бара дзорга мӧдлапӧвлань —
Оз-ӧ нин менӧ сэтчӧ корны?