* * *

Войыс — кӧть синтӧ эн куньлы,
Югыдджык ӧдвакӧ эм.
Кодлыкӧ муса зэв лунвыв,
Сӧмын, дерт, абу мен.

Быдлаын рӧдвуж и ёртъяс —
Ставлысь ог помнит и ним.
Овлӧ мӧй шудтӧмӧн мортыс,
Орччӧн кӧ эм чужанін?

Дорся кӧ эм чужан мылькыс,
Куйлӧны кӧн пӧль и бать.
Вичмыліс мем налӧн мывкыд,
Киподтуй, сямлун и стать.

Ми — зумыш пармалӧн пиян,
Медвылӧ пуктылам удж.
Мудзсӧ кӧ оз тӧдны кияс,
Олӧмыд мортыдлӧн куш.

Кытчӧ кӧть туйяс оз нуны,
Муслунӧс нинӧм оз вен.
Лӧсьыд зэв шондіа лунвыв...
Войвылыс — медмуса мем.