СИН ВОДЗЫН

Ог эскы ни чӧртлы, ни енлы,
И шудлунӧй таысь оз чин.
Ме здук йылысь некор ог вензьы,
Кор син водзын — ас чужанін.

Кор син водзын — дзоридза видзьяс,
И на дорӧ ляскысьӧм ю.
Кор син водзын — пожӧмъяс, кыдзьяс,
И пуяссӧ сувтӧдысь му.

Ме унатор аддзылі светас,
Но помнитсьӧ дзик ӧтитор:
Кор юрсиӧс йӧз тӧлыс летіс:
Медшог меным вӧлі, меднор.

Ог эскы ни чӧртлы, ни енлы,
И шудлунӧй таысь оз чин.
Ме син водзын — чужанін менам
И ловлӧн, и сьӧлӧмлӧн ин.