УЗЬӦНЫ

Ая-пиа мунӧны ылі ягӧ, кӧні быдмӧны зойта пожӧмъяс. Туйыс мунӧ вӧр питі. Буско ньӧжйӧник рӧдтіс. Пиньсӧ йирис, дзуртіс додь улын лым. Пуяс костті мыччасис луншӧр шонді. Туй бокын кодзув моз дзирдаліс быд лым чир, лӧнь. Туй пӧлӧн сулалісны вӧснидик ньӧръяс, ляпкыдик пожӧмъяс, сё арӧса лысъяс.

— Но-ӧ, Буско, тувччав! — Кыліс айыслӧн гӧлӧс.

— Батьӧ, мыйла нӧ пуясыс чӧв ланьтӧмаӧсь? Оз весиг лапъяснас вӧрны?

— Шойччӧны, пиӧ, шойччӧны.

— Мыйла нӧ, батьӧ, мукӧдыс лаптӧмӧсь, кушӧсь?

— Узьӧны пиӧ, узьӧны.

— Батьӧ, тайӧяс нӧ пыр узьӧны оз?

— Садьмасны, пиӧ, садьмасны.

— Кор нӧ, батьӧ, садьмасны, кор?

— Тулыснас, пиӧ, тулыснас.

— Кор нӧ, батьӧ, тулысыс воас?

— Воласны кӧдзыдъяс, пургаяс. Сы бӧрын тулыс воас. Сьывны кутасны лэбачьяс.

— Батьӧ, кӧнӧсь нӧ лэбачьясыс?

— Узьӧны, пиукӧй, узьӧны.

— Кынмыны куті ме, батьӧ. Пола ме...

— Эн пов, пиукӧй: тэкӧд ми огӧ на унмовсьӧй...

Сёрни ланьтіс. Ая-пиа пукалӧны доддьын. Вой шӧр лайкыд унмӧн узис ывла. Ньӧжйӧник туй кузя рӧдтіс Буско.