КОМИ НЫВБАБАЯСЛЫ, КОДЪЯС ВӦЛІНЫ ОБЛАСТНӦЙ КОНФЕРЕНЦИЯ ВЫЛЫН!

Коми чойяс, тьӧткаяс!

Ті вӧлінныд Коми му шӧрын, шӧр карын Ті уна сёрнитінныд бур сёрни. Тіянлы висьталісны: кыдз колӧ овны, мый колӧ керны, кыдз колӧ челядьӧс быдтыны, висьӧмъясысь асьтӧ видзны да уна мукӧдтор йылысь.

Ӧні ті верманныд висьтавны и мукӧд нывбабалы, мый ті асьныд кывлінныд. Ми тіянӧс корам: отсалӧй жӧ миянлы олӧмсӧ кокньӧдны, бурмӧдны.

Ми аддзылім, ті гӧгӧрвоӧмныд сӧветскӧй власьтсӧ, ті шыбитӧмныд важ лёк олӧмсӧ, пемыд олӧмсӧ и мӧдӧмныд водзӧ.

Мед шуӧны, кодлы колӧ да кодлӧн век на пемыд вежӧрыс: нывбаба помысь пӧ нинӧм оз ло. Ті налысь энӧ кывзӧй, вӧчӧй кокни долыд олӧм! Мыйкӧ кӧ тіян оз кут артмыны — юасьӧй велӧдчӧм йӧзлысь, асланыд отделысь, найӧ тіянлы отсаласны.

Коми пӧслӧвича шуӧ: «Велӧдчытӧг попӧ он во».

Ми тӧдам, коми нывбабаясӧс важ правительство нинӧмӧ эз велӧдлы, — некод тіянлысь уна оз кут корны, некод ёна оз кут дивитны. Уджалӧй, керӧ мый верманныд, мый кужанныд. Ми тіянлы висьталім, кутшӧм йӧзӧс колӧ бӧрйыны Исполкомъясӧ, кыдзи колӧ уджавны сӧветъясын, кыдзи колӧ коммуниставны; сідзи жӧ висьталӧй и ті асланыд йӧзлы. Оз кӧ кутны тіянлысь кывзыны, оз кутны тіян сӧветъясыд да коммунистъясыд декретъяс кузя (закон кузя) олӧмсӧ нуӧдны, висьталӧй асланыд ыджыд бӧрйӧм йӧзлы, найӧ ставсӧ лӧсьӧдасны.

Ещӧ ми тіянлы шуам: ӧтувтчӧй став нывбабаяс, уджалӧй ӧтулысь, ставыс ловӧ бур!

Мед олас выль олӧм — сӧветъяс дырйи!

Мед оласны став нывбабаыс!

Мед олас Коммунист партия, коді перйис став уджалысь йӧзлы бур-вӧляа олӧм!

Торлопов