МИР ТУЙ ДОРЫН

Мир туй дорын,
Бадь пу улын
Нёль пельӧса
Йӧр тыдалӧ.
Йӧр шӧрас сэн,
Турун пӧвстын
Сажень кузя
Нӧрыстор эм.
Нӧрыс улын,
Пемыд гуын,
Ой, гӧрд салдат
Гортйын узьӧ.
Оз кыв сійӧ,
Оз нин аддзы
Винёв бадьлысь
Кышӧдчӧмсӧ:
Юрсӧ сылысь
Ыргӧн пуля
Сизимлаті
Жугӧдӧма.
Шыӧн, пуртӧн
Сылысь сьӧлӧм
Розьӧдлӧма,
Бытшйӧдлӧма.
Шуда, мича,
Кокни, вежа
Олӧм понда
Косясьӧма.
Пищаль босьтіс,
Фронтӧ муніс.
Гӧрд власьт понда
Сійӧ усис...
Вир юысьяс,
Генералъяс,
Гӧрд салдатӧс
Кутӧмаӧсь.
Вына сойсӧ,
Ён кокъяссӧ
Кыз кӧрт чептӧн
Домалісны.
Мир туй дорӧ,
Нӧрыс шӧрӧ
Вайисны да
Сувтӧдісны.
Сылы синмас,
Чужӧмбанас
Кристослы моз
Сьӧлалісны.
Радлігтырйи
Вӧсни орсӧн
Сійӧс усьтӧдз
Кучкалісны.
Кодыс штыкӧн,
Кодыс пуртӧн
Гӧрд салдатӧс
Бытшкалісны.
Пиньсӧ курччис,
Юрсӧ лэптіс,
Кырнышъяслы
Кывъяс шуис.
Сылӧн кывъяс,
Ыджыд гым моз,
Ас гӧгӧрыс
Паськалісны:
«Кулі кӧ ме,
Быри кӧ ме —
Лӧсьыд, шуда
Олӧм понда;
Быра кӧ ме,
Сісьма кӧ ме —
Ставмувывса
Гӧль йӧз понда;
Мекӧд орччӧн,
Менам туйӧд
Локтӧны гӧрд
Багатыръяс.
Найӧ татчӧ
Локталӧны, —
Джагалад ті,
Сьӧд кырнышъяс».
Сьӧд кырнышъяс
Кывсӧ шуны,
Помавнысӧ
Эз и лэдзны.
Морӧс шӧрас
Гӧрд салдатлы
Лэчыд шыӧн
Бырскӧбтісны.
Виӧм бӧрын
Ракаяслы
Мир туй вылӧ
Шыбитісны.
Паськыд мир туй,
Садъя мир туй
Ӧтнас олӧ,
Кышакылӧ.
Ылі муысь,
Нӧрыс йылысь
Гӧрд ёртъясӧс
Дінас корӧ.
Лун-вой мунӧ...
Бусыс пуркйӧ
Садъя паськыд
Мир туй кузя.
Ыджыд чукӧр
Гӧрд салдатъяс
Мир туй вылын
Тыдовтчисны.
Коньӧр ёртсӧ,
Шуда воксӧ
Ошкигтырйи
Гуалісны.
Бадь пу улӧ,
Мир туй дорӧ
Мича, гажа
Гу лэптісны.
Пӧрысь бадь пу
Сэн, гу дорас,
Нюклясьӧ да
Кышакылӧ.
Мича вӧтъяс,
Мича муяс
Вӧтасигтыр
Сійӧ узьӧ.
Уна бур йӧз,
Помтӧм войтыр
Ветлӧ-мунӧ
Мир туй кузя.
Му выв пасьта
Салдат йылысь
Гӧрд юӧрсӧ
Разӧдӧны.