ВЕЙНЕМЕЙНЕЛӦН КАНТЕЛЕӦН ВОРСӦМ

«Калевала» нима фин эпопеяысь

Пӧрысь веськыд Вейнемейнен,
Ыджыд немӧвӧйся тӧдысь,
Гажа вадор вылӧ петіс,
Сьывны из вылӧ сэн пуксис.
Босьтіс кантеле ки улас,
Пидзӧс вылас сійӧс пуктіс.
Татшӧм кывъяс кутіс шуны:
«Волӧй кывзыштнытӧ татчӧ,
Коді войдӧр эз на кывлы
Нэмтӧм сьыланкывлысь шысӧ!»
Ворсны кутіс Вейнемейнен.
Эз коль зверыс паськыд вӧрас:
Став нёль кока олысь пытшсьыс
Быдӧн кывзыштнытӧ локтіс,
Шензигтырйи нимкодясьны.
Гажа уръяс гыжъясигтыр
Пуысь пуӧ чеччалісны.
Матыстчисны сьӧдбӧж чукӧр.
Пуксялісны потшӧс пӧлӧн.
Йӧра чеччаліс эрд вылын.
Весиг рысьлы нимкодь вӧлі.
Садьмис кӧин нюръяс вылын,
Тшӧкыд коз пу лапъяс пытшкын,
Лыа вылын, пожӧм пӧвстын
Чеччис-сувтіс ачыс ошкыс.
Кӧин котӧртӧ нюр вомӧн.
Ошкыс тэрмасьӧ вӧр пытшті,
Пуксьӧ сійӧ завор дорӧ.
Дзиръя бердӧ сійӧ пуксис,
Изъяс вылӧ кисьтіс потшӧс,
Пӧри дзиръя лыа вылӧ.
Пожӧм вылӧ сэки кайӧ
Ворсӧм кывзыштны мед вермас,
Шензигтырйи нимкодясьны.
Став тӧвйывса лэбалысьяс,
Став кык бордъя пӧткаясыс
Жбыракылӧ локталісны.
Локлісны да пуксялісны,
Медым кывны ворсӧм шыяс,
Шензигтырйи нимкодясьны.
Кыліс кутш Суоми кузя
Гортсӧ оліг ворсӧм шыяс.
Колис пиянсӧ сэк позъяс.
Ачыс веськыда и лэбзьӧ
Герой кантелеыс вылӧ,
Кӧні ворсіс Вейнемейнен.
Вылі-вылісянь кутш лэччис,
Кымӧр сайсянь локтіс варыш,
Гӧпъяс вылысь петіс утка,
Юсьяс петалісны зілясь.
Весиг дзува-лювакылысь,
Ичӧт зяблик кыськӧ лэбзис,
Ӧтлан чижикъяскӧд локтіс.
Накӧд сырчикъяс ыб вылысь
Сюрсӧн-сюрсӧн лэбалісны,
Пуксялісны пельпом вылас.
Сідзи ворсіс пӧрысь айыд,
Шензьӧдаліс Вейнемейнен.
Ваын, юын эз коль некод,
Кодлӧн тювкъясьны эм бордныс.
Эз коль сэтчӧ чери чукӧр.
Ставыс локтіс ворсысь дінӧ
Шензигтырйи нимкодясьны.
Сувтіс ылӧджык сир чукӧр.
Сьӧмга рифъяс дорысь локтіс,
Джуджыдінъясысь сиг воис,
Уйис гӧрд синдора ёкыш,
Корюшкаяс локталісны,
Камыш бердӧ сувталісны.
Косӧ петалісны найӧ
Сьылӧм сьылысьлысь кывзыны,
Ворсӧм вылас нимкодясьны.
Пӧрысь веськыд Вейнемейнен
Ворсӧ лун и мӧд лун ворсӧ.
Эз коль некод ён йӧз пытшкысь,
Эз коль сэні верӧс пӧвстысь,
Кӧса новлысь гӧтыр пиысь,
Ворсӧм понда бӧрдтӧм мортыс.
Кодлӧн сьӧлӧмыс эз вӧрзьы?
Том йӧз бӧрдӧ, бӧрдӧ пӧрысь,
Бӧрддзалісны гӧтыртӧм йӧз.
Повтӧм гӧтрасьӧма мортъяс,
Сэні бӧрдӧны том зонъяс.
Гырысь нывъяс бӧрддзӧмаӧсь,
Бӧрдӧны и посни нывъяс.
Сэтшӧм лӧсьыд ворсӧм шыыс,
Сэтшӧм шензянаа ворсіс.
Бӧрдӧ ачыс Вейнемейнен.
Ёна петӧ сылӧн синва.
Синсьыс гӧгыльтчӧны войтъяс,
Жемчуг кодьӧсь гылалӧны.