ЫДЖЫД КОМИ СЬӦЛӦМЛЫ

К. Ф. Жаков кулӧм кузя

	Веськыд коми мортӧн чужин —
	Коми мортӧн кулін.
	Косьӧн олӧм вомӧн вуджин.
	Ӧні — кыз му улын.
	Мед кӧть гирзяс муыс-ваыс —
	Коми котыр сьылам
	Тэнад вынйӧрыдлы ставӧн
	Гора ошкан сьылӧм...
	Локтіс гундыр рытыв мусянь,
	Коми йӧзӧс виӧ.
	Оз нин кывны ён йӧз гусянь...
	Коді начкас сійӧс?
	Оз нин кутш моз, йӧра сямӧн,
	Йиркап лэбав лызьӧн.
	Оз нин ыджыд тӧдысь Пама
	Коми йӧзӧс шызьӧд.
	Пера багатырным шойччӧ
	Кыз му улын, пыдын.
	Код нӧ петас косьӧн воча?
	Кӧн нӧ сійӧ, кытӧн?
	Кӧрт культура гундыр пытшкӧ,
	Гудыр сир би пиӧ
	Сталь сирпиньӧн горшас ыстіс
	Йӧзным Выльгорт пиӧс.
	Вой шӧр войын Биармия
	Йӧзлы корсьны мунін...
	Лоӧ Биармия миян —
	Ӧні корсям... лунын!
	Мед кӧть гирзяс муыс-ваыс —
	Коми котыр сьылам
	Тэнад вынйӧрыдлы ставӧн
	Гора ошкан сьылӧм.