ШОГ

Джуджыд керӧс вылын
Сулалӧ важ керка.
Челядьыскӧд сэні
Олӧ Марпа тьӧтка.

Керка тырыс челядь,
Батьныс война вылын;
Ас костсьыныс сійӧс
Нуӧмаӧсь ылӧ.

Ӧтчыд страдна дырйи
Небесасянь шонді
Нимкодясигтырйи
Гажа мусӧ шонтіс.

Любуйтчис став йӧзыс
Югыд шонді вылӧ;
Турун чукӧртігӧн
Сьыланкывъяс сьыліс...

Тільсьӧ Марпа тьӧтка
Татшӧм мича лунӧ:
Быд лун сійӧ ӧтнас
Уджъяс вылӧ мунӧ.

Горт олӧны челядь,
Посньыдикӧсь ставныс,
Ыджыдыслы лои
Сӧмын сизим арӧс.

Думайтчӧ горт йывсьыс,
Гортсянь сійӧ ылын;
Оз вунлы дум вывсьыс
Челядьясыс сылӧн.

Кор нин бара батьыс
Челядьяслӧн воас?
Сэки, гашкӧ, налы
Гажа луныс лоас.

Лёдз топӧдіс Марпа,
Кутіс юръяс вӧчны;
Турун моздоръяссӧ
Кӧсйӧ юрӧ тэчны.

Керӧс весьтысь ылысь
Друг сэн сьӧд тшын аддзис;
Повзис Марпа тьӧтка,
Тайкӧ бырӧ садьыс.

Буретш керка весьтсьыс
Джуджыд керӧс сайысь
Мисьтӧм пемыд тшыныс
Пуркъялігтыр кайис.

Куртанінысь дугдіс,
Эновтіс тшӧтш лёдзсӧ.
Уськӧдчис зэв ӧдйӧ
Видзӧдлыны гортсӧ.

Эз и тӧдлы, кыдзи
Ас берегас лоис,
Кыдзи мудзӧм кокнас
Гӧра йылӧдз воис.

Сылӧн керка-с сотчӧ!..
Кывйыс эз кут вӧрны,
Юрси сувтса сувтіс...
Весьӧ кутіс пӧрны.

Воис керка дорӧ, —
Ваймӧ керка сылӧн,
Жара сотчӧ. Лёкысь
Тручка-трачкакылӧ.

Чукӧртчӧмась сэні,
Зычитӧны йӧзыс.
Уськӧдчисны паныд
Бӧрдысь челядьясыс.

Кытшовтӧмась Марпа-с
Грездса бабаясыс;
Увгӧ, видчӧ, шогсьӧ
Марпа понда йӧзыс.

«Кыдз нӧ позьӧ челядь
Ас кежаныс кольны?!.
Вермасны ӧд найӧ
Став вӧлӧсьтсӧ сотны».

Бӧрдӧ Марпа тьӧтка,
Синванас и мыссьӧ.
Водздӧраыс вылӧ
Синва сылӧн киссьӧ.

Челядьясыс сылӧн
Шемӧстӧмӧсь сэні,
Бӧжас кутчысьӧмӧн
Нёльӧн сулалӧны.

Локтӧ йӧз видз вылысь.
Улын лои шонді.
Войтыр пӧжар вылысь
Разӧдчыны пондіс.

Лыдтӧм-тшӧттӧм пыжа
Паськыд Эжва вывті
Мудзӧм коми йӧзлӧн
Узьны гортас кывтӧ.

Челядьяскӧд Марпа
Йӧзӧ узьны пырис:
Сутшкысисны челядь,
Налӧн шогыс бырис.

Шонді ньӧжйӧникӧн
Лэччис пуяс сайӧ.
Марпа керка весьтысь
Тшыныс век на кайӧ.

Оз узь Марпа. Шогсьӧ.
Куш ачыс ӧд коли...
Сы син водзын челядь
Куткыртчӧмась нёльӧн.

Мукӧдыслысь керка
Биысь «енмыс» видзис, —
Быдӧнлӧн тай налӧн
Вӧлі кага видзысь.