УДЖ ДЫРЙИ СИКТЫН

Шонді водзын Эжва вылын
Посни чери гыбалӧ.
Лысъяс кості керӧс улын
Выльсикт еджыд тыдалӧ.
Енэж вылын лун шӧр шонді
Дзирдалігтыр ломтысьӧ.
Коми мусӧ сотӧ, шонтӧ...
Ловъя олысь шонтысьӧ.
Оз кыв увгӧм. Выльсикт узьӧ.
Ставыс гӧгӧр шы ни тӧв...
Коркӧ кывлас — мир туй кузя
Пошта зиль-зиль гӧнитас.
Муяс вылын коськӧм йӧрын
Еджыд потшӧс вералӧ.
Пожӧм пуяс сикт берд вӧрын
Ставыс радлӧ, сералӧ.
Посни челядь ыркыд чомйын
Пӧлӧскаӧн ворсӧны.
Дзебсьӧмаӧсь би кодь гожйысь,
Оз кыв налӧн горзӧмныс.
Выльсикт кузя мир туй вылын
Ловъя морт оз тыдовтчыв,
Кытчӧдз шонді рытыввылӧ
Асывсянь оз кытшовтчы.
Нюжӧдӧмась кывсӧ понъяс,
Керка сайын кашкӧны.
Карта ӧдзӧс водзын ыжъяс
Ӧтчукӧрын пошкӧны.
Шонді вешйис веськыдвылӧ, —
Лои рытъя веськыда.
Муніс странник асыввылӧ
Мир туй кузя веськыда.
Мунӧ ньӧжйӧ. Буссӧ лэптӧ:
Бедьнас мусӧ гирсйӧдлӧ.
Оз-ӧ кодкӧ сёйны сетышт,
Быд ӧдзӧсӧ видзӧдӧ.
Кутлас кайны кильчӧ поскӧд, —
Ӧшалӧны томанъяс.
Кильчӧ ӧдзӧс ыджыд роскӧн
Тасалӧма вомӧныс.
Кок шы челядьлы кӧ кылас —
Шемӧстӧмӧсь лоӧны.
Чомсянь странник шытӧв вылӧ
Оз шыасьны, полӧны.
Гожйыс ньӧжйӧникӧн чині.
Выльсикт кутіс ловзьыны.
Эз нин вывті пӧсь ло сэні —
Чомйын эз кут овсьыны.
Петіс челядь мир туй вылӧ.
Керӧс дорӧ лэччисны.
Пӧчлӧн онзіль муніс ылӧ,
Ставыс бара чеччисны.
Паськыд Эжва керӧс улын
Енэжыскӧд лӧзалӧ.
Мӧдлапӧлын видзьяс вылын
Куртӧм, чӧвтӧм тыдалӧ.
Рытыв-войӧ лэччис шонді:
Рытъя кыа вижӧдӧ.
Мудз йӧз гортас локны пондіс,
Эжва тыри пыжаӧн.
Вадор уличьяссянь йӧзыс
Люзьгӧ, петӧ вӧлӧсьтӧ.
Гурйыв лои кильчӧ ӧдзӧс,
Садьмис сійӧ вӧлисти.