ТӦДТӦМ САЛДАТЛӦН ГУ

Мӧскуа шӧрын
Баситӧм йӧрын,
Кремль стена бердын,
Эм — тӧдтӧм салдатлӧн гу.
Йӧзыс кор мунӧ
(Ветлысь сэн уна),
Сувтыштлӧ сэтчӧ,
Чӧв ланьтлӧ, нинӧм оз шу.

Тырӧма чветӧн
Гу вылыс, сэтӧн
Лун и вой ломзьӧ — 
Ыпъялӧ куслытӧм би.
Куйлӧ, дерт, татӧн
Кремль бердын матын
Кодлӧнкӧ батьыс,
Верӧсыс, сё муса пи?

Ог тӧдӧй, коді
Му пиӧ водӧм.
Нимыс ни овыс...
Ог тӧдӧй, кутшӧмджык ёрт
Столица шӧрын
Гажа сад йӧрын
Аддзӧма аслыс
Нэмчӧжся нималан горт.

Гашкӧ нӧ айӧ
Куйлысьыс тайӧ?
Ыджыдджык вокӧй?
Ог тӧдӧй, ог тӧдӧй ми!
Сё рӧма дзоридз
Кремль стена дорын,
Факелӧн ыргӧ — 
Ыпъялӧ куслытӧм би.

Лелькуйтӧм гортъяс
Куйлысьяс, ёртъяс,
Ставнымлӧн миян
Бать и пи, сьӧлӧмшӧр ёрт:
Кось вылӧ петіс,
Олӧмсӧ сетіс,
Геройӧн уси
Чужан му шуд вӧсна морт.

«Куслытӧм слава!» — 
Ӧтвылысь ставӧн
Геройлы сиӧ
Йӧз миян, Сӧветскӧй му.
Мӧскуа шӧрын
Баситӧм йӧрын,
Кремль стена бердын
Эм — тӧдтӧм салдатлӧн гу...