СИР ШОГ ОЛӦМ

Ок-ок! Пекла тьӧтка,
Омӧль олӧм ӧні, —
Миян грездын кузь лун
Большевикасьӧны.

Митьӧ Педӧр шуӧ:
Му вежӧм пӧ воис,
Сы понда пӧ олӧм
Татшӧм омӧль лоис.

Миян Семӧ улльӧв
Куття лунӧ сёйис,
Да и шуӧ нӧшта:
«Сьӧлӧм вылӧ воис!..»

Кывзы, Пекла тьӧтка,
Висьтала ме дивӧ:
«Ме пӧ большевик жӧ» —
Шуӧ миян Ивӧ.

Аттӧ, Пекла тьӧтка...
Мужик менам юӧ...
Менӧ сійӧ сӧмын
Буржуйӧн и шуӧ.

Вӧтасьӧма Лаврень:
Антикрист пӧ чужи,
Синъясыс пӧ — кольча.
Сылӧн тайӧ уджыс!..