МЕД ЛОАС!

Парма пасьта ветлӧдлӧны гыяс...
Бара кылӧ коми йӧзлӧн шыяс:
«Кӧсъям югыд долыд олӧм,
Сійӧн (нинӧкутшӧм полӧм!) —
Мед лоас республика миян,
Мед лоас ӧтлаын став коми пиян!»
	Мӧд пӧлӧс
	Гӧлӧс
	Оз вермы лоны!
	Оз вермы лоны!
Уна сё во нартитчис роч кырныш чукӧр,
Эг аддзылӧй ми, коми войтыр, шонді югӧр.
Уськӧдчисны катша-рака моз тэ вылӧ,
Чуш-чаш вӧчыштісны кылӧ,
Ки-кокъястӧ шыблалісны ылӧ —
Кардорланьӧ, Перымланьӧ, Вӧлӧгдаӧ.
	Юкӧй,
	Кырныш чукӧр!
	Йирӧй, аджӧй, пурӧй —
	Чӧскыд вомтыр сюри!
Но вот ӧтчыд асъя кадӧ
Би дон ӧдйысь,
Мӧлӧтувса бикиньясысь
Чужи тӧдысь.
Вайӧма лов зелля сьӧрсьыс...
Коми йӧзыд вӧрзис...
Джынйыс.
Мӧд джынйыс
Важ моз торъя...
	Мед оз ло торъя!
	Веськыд кыв шу, коми пи!
	Веськыд кывйыд — би.
Парма пасьта ветлӧдлӧны гыяс,
Бара кылӧ коми йӧзлӧн шыяс:
«Кӧсъям югыд долыд олӧм,
Сійӧн (нинӧкутшӧм полӧм!) —
Мед лоас республика миян,
Мед лоас ӧтлаын став коми пиян!»
	Мӧд пӧлӧс
	Гӧлӧс
	Оз вермы лоны,
	Оз вермы лоны!