ЛЕНИН КУЛӦМ КУЗЯ

Му тіралӧм^землетрясение/^, гашкӧ, буа кыліс?
Эз-ӧ саридз гы став мусӧ койышт?
Эз... паськалі юӧр
Ленин кулӧм йылысь!
Эз ло Ленин — 
Му вылыслы юӧр воис.
Сувтлы, шонді!
Алмаз кодь лым чирыс
Мед оз дзирдав эзысь рӧмӧн.
Дугдыв, ланьтлы, енэж пи!
Тэ ӧд тӧдан:
Оз нин Ильичыдлӧн визъяв
Сӧнъясас пым вирыс,
Оз нин ыпъяв
Пӧсь сьӧлӧмас би?!
Завод, фабрик! Посни, гырысь!
Кывзы, став му вывсьыс
Став уджалысь морт:
Талун быри
Уджалысьлӧн медся ыджыд ёрт.
Оз нин некор би кывворыс
Ломзьӧд пӧжарвывса жар,
Революциялӧн домна дорысь
Муніс
Ыджыд кочегар!
Сиктысь, кодыр ыб выв йӧрті 
Ветліс-ордліс пурга лым, — 
Аддзылі ме:
Тошка дядьӧ кага этшӧн бӧрдіс,
Ньӧтчыд бӧрддзывлытӧм мортлӧн
Синва тёпкис пым.
Сідзкӧ, тайӧ каднас, кор дон кӧртӧн
Вуштам важ муыслысь сім,
Унапӧвста стальнӧй шӧртӧн
Прӧстӧй йӧзкӧд
Йитчӧма Ильичлӧн ним.
Сідзкӧ, войтыр пытшкас сэні
(Сэтысь Ленинӧс он ну!)
Кутас овны
Миллион юра Ленин!..
Сідзкӧ, Ильич оз и кув!..
Мыйла му тіралан гымыс кылӧ?
Мыйла лэбзьӧ-юргӧ ёсь чардбиӧн
Му пасьтала юӧр
Ленин кулӧм йылысь?
Юӧр,
Мый эз ло
Ленин миян?