РЫТЪЯ ШОНДІ

Саридз дорын рытъя шонді
Лэччыны нин пондіс.
Тэкӧд кыкӧн, дона нылӧй,
Кайим гӧра йылӧ.

Коктебельса лӧзов море
Синъяснымӧс ёрис.
Гажа вӧлі ывла вылыс,
Мойдіс муслун йылысь.

«Рытъя шонді эз на кус ӧд,
Тэныд сійӧ муса?» —
Юалі ме дона ёртлысь,
Коді муніс орччӧн.

Эз шу нинӧм дона нылӧй,
Коліс шуны сылы:
«Шондіыс кӧ асъя вӧлі,
Дзулькйӧн пуис сьӧлӧм!»

Рытъя шонді нюммуныштіс,
И ме бара ышті:
Пукті морӧс бердад киӧс:
Морӧс вӧлі биа.

И тэ сэки, муса нылӧй,
Кутін менсьым сьылі,
Читкыртыштін вильыш синтӧ,
Менӧ окыштін тэ:

«Аддзан: рытъя шонді югыд,
Море абу жугыль,
Кутшӧм гажа гӧра вылас!
Муыс ставнас сьылӧ!

Сьыв жӧ, сьыв жӧ, зонмӧй, тэ тшӧтш:
Муслун абу этша!»
Збыль, дерт: вижов, кусысь шонді
Эз нин бура шонты,

Но ӧд лӧзов саридз вылыс
Мойдіс муслун йылысь!