ТЭКӦД МИ ВОИМ

Тэкӧд ми воим
Зэв мича расӧ,
Мичлун кӧн койис
Тувсовъя асыв.

Кытчӧкӧ ылӧ
Воим ми тэкӧд.
Сё зарни нылӧй,
Пыр вӧлін мекӧд.

Сэтӧні мойдіс
Дзольгӧмнас шор ӧд,
Сьӧлӧмӧс дойдіс
Колиплӧн горыс.

Тэ йылысь сьыліс
Колипкай сэки.
Сё муса нылӧй
Пыр вӧлін мекӧд.

Ёна нин пыдӧ
Пырим ми тэкӧд.
Петан туй кытӧн?
Вошим аль эгӧ?

Со тай эм ордым.
Мӧдӧдчам сэті,
Рас пытшсьыс гортӧ
Мунны вай петам.

Ог мунӧй татысь!
Колип тан сьылӧ,
Ме дінын матын,
Сё зарни нылӧй.

Оз ков мем гортӧй,
Оз ков мем немтор,
Сё дона ёртӧй
Сьӧрсьым ӧд эм со.

Рассьыс став пусӧ
Радейта ёна.
Нылыс мем муса,
Нылыс мем дона.