ИЧӦТДЫРСЯ ЁРТӦЙ КУЛӦМ КУЗЯ

Тӧд вылын, мӧдзаӧй, ичӧтдыр олӧмлӧн гажӧй,
Син водзын векньыдик чужӧмыд,
Жугыля видзӧдысь синмыд.
Тӧд вылын важыся лӧсялӧм олӧмным тэкӧд:
Вуграсьӧм — кыркӧтшын би дорын узьӧм,
Дырнӧсын купайтчӧм, Зятельын дурӧм,
Шорпонын ислалӧм, катушка киськалӧм,
Плошкаяс ӧзталӧм, би дорын сьылӧм,
Важыся гажӧдчӧм, олӧм и вылӧм...
Лёк шудыд нетшыштіс гортсьыд,
Казеннӧй нянь сёйны тшӧтш лои мунны,
Кыдзсюрӧ быдмӧмнад, сьӧкыда олӧмнад
Омӧлик дзоньвидзыд вӧлі.
Мунӧ тай пӧраыд. Уна нин том йӧзӧс
Висьӧмъяс, пуляяс сюйисны муӧ.
Абу тай приччаыд кольӧма тэнӧ...
Коньӧрӧй мӧдзаӧй, йӧз муын кулін тэ,
Йӧз кывъя салдатъяс пӧвстын.
Йӧз муӧ гутӧ тэд кодйисны,
Дӧзмисны тыртігад гутӧ.
Узь жӧ тэ, мӧдзаӧй, кӧнікӧ ылын...
Оз лок тэд гу вылад
Сыркъявны-горзыны мамыд...