ШУИС МОРТЛЫ МОРТЫД

Шуис мортлы мортыд:
«Кӧн нӧ тэнад гортыд?»
— Менам гортӧй,
Ичӧт мортӧй,
Пожӧм йылын ӧшалӧ,
Вой тӧв вылын тӧлалӧ».
«Кӧн нӧ, — шуис Васька:
Тэнад мича паськӧм?»
— Менам паськӧм,
Дзӧля Васька,
Паськыдінын дзордзалӧ,
Менӧ корӧ, виччысьӧ.
Шуис мортлы тьӧтка:
«Тэнад кӧн шуд-пӧтка?»
— Пӧтка менам
Ылӧ мунӧм,
Меным мывкыд аддзыны,
Олӧм-вылӧм лӧсьӧдны.
Шуис мортлы дядьӧ:
«Тэ нӧ, мортӧй, садь-ӧ?»
— Кысь нӧ меным,
Дядьӧй, вина,
Кодыр зептӧй рекмӧм,
Рушку-кынӧм тшыгмӧм.
Шуис мортлы мамыс:
«Воши пилӧн сямыс,
Кытчӧ мунӧ,
Сэтчӧ сунӧ —
Увлань юрӧн тупыльтчӧ,
Мыйкӧ век со жугыльтчӧ».
Шуис мортлы дедыс:
«Дивуйтчӧ став светыс.
Дугды сӧрныд,
Йӧйӧ пӧрныд,
Лӧсьыда да бура ов,
Дивитӧмысь йӧзысь пов!»
Шуис кодкӧ: «Пиӧй,
Шыбитчы кӧть биӧ,
Тыртӧм кынӧм,
Сёйныд нинӧм —
Зептад ӧти куимур,
Мед тэ мича, мед тэ бур».