«ЙӦЙ» ИВАН

Туй кузя кӧмтӧм
Тӧв шӧрын, тӧлын
Котӧртӧ вӧньтӧм,
Тэрмасьӧ «йӧй» морт.
Коньӧрӧй, коньӧрӧй,
Кытчӧ нӧ мунан?
Коньӧрӧй Иванӧй,
Кытчӧ нӧ мунан?
Кӧдзыд зэв, кӧдзыд зэв,
Лым быдсӧн дзуртӧ;
Йӧй Иван кынмӧ тай,
Йӧй Иван ружтӧ.
Коньӧрӧй, коньӧрӧй,
Кытчӧ нӧ мунан?
Коньӧрӧй Иванӧй,
Коктӧ ӧд кынтан!
Йӧй Иван котӧртӧ,
Йӧй Иван пышйӧ;
Сы бӧрся ыджыд пон
Усьласьӧ, вӧтчӧ.
Йӧй Иван, йӧй Иван,
Кытчӧ нӧ пышъян?
Сувтлытӧ, сувтлытӧ,
На кӧть со чышъян!
«Йӧй локтӧ, йӧй локтӧ!
Кильчӧтӧ игнав;
Кежны, зон, кутас кӧ,
Изйӧн тэ шыблав!»
Йӧй Иван, йӧй Иван,
Мыйла нӧ тэысь
Полӧны татӧн!
Кыдзикӧн биысь?..
Коньӧрӧй, тэнад ӧд
Нюкыртӧ кынӧм:
Куим лун, нёльӧд нин
Сёйны тэд нинӧм!
Коньӧрӧй, коньӧрӧй,
Коді нӧ шонтас?
Иванӧй, Иванӧй,
Коді нӧ вердас?
«Йӧй» Иван ай-мамсӧ,
Рӧдвужсӧ оз тӧд;
Некод ӧд сылы, дерт,
Паныдсӧ оз пет!
Йӧй Иван, йӧй Иван,
Кытысь тэ ачыд?
Коньӧрӧй Иванӧй,
Код тэнад батьыд?
Кӧдзыд зэв, кӧдзыд зэв,
Тірала пасьӧн…
Иванлӧн став пельыс
Еджыд нин важӧн.
Иванӧй, Иванӧй,
Кепысьыд кӧні?
Коньӧрӧс Иванӧс
Кӧдзыдыс венӧ.
«Йӧйыд со котӧртӧ», —
Челядьлы индӧ: —
«Оз ӧд и кынмы дай», —
Висьталӧ синтӧм.
— Ичиньӧй, керкаад
Лӧсьыд, дерт, тэныд!
Петан кӧ кӧмтӧгыд,
Ёна-ӧ шоныд?
Чуньясыс пиалӧ
Иванлӧн важӧн.
Синъяссьыс виалӧ
Синваыс шерӧн.
Иванӧй, Иванӧй,
Код тэнӧ чужтіс?
Коньӧрӧй Иванӧй,
Код тэнӧ быдтіс?
Горзӧ нин кӧдзыдла
Иваныд миян.
Кӧдзыдӧй, дзикӧдз ӧд
Коньӧрӧс виан!
Коньӧрӧй Иванӧй,
Мыйла тэ шудтӧм?
Майбырӧй, быдсӧнлы
Мыйла тэ мустӧм?
Пыран кӧть шонтысьны —
Кильчӧыд пӧдса:
Абу ӧд гӧльыдлы
Некод дзик тӧдса!
Иванӧй, мыйла нӧ
Йӧз тэнӧ венӧ?
Мыйла нӧ йӧй пыдди
Лыддьӧны тэнӧ?