НЕМАС УДЖАЛЫСЬӦтчыд кӧдзыд тӧвся лунӧ Вӧрысь, кыйсьӧм бӧрын петі. Водзын пес доддя вӧв мунӧ, — — Воис чой да суи сэті. Вӧвсӧ ас кежсьыс ме чайті, Видзӧда да: вӧв ныр увті, Муртса тыдыштӧ лым сайті, Морт дзонь восьлалӧ... Вӧв сувтіс. Аддза: тюни, пеля шапка, Шарпыс — чышъян, пасьыс — ыж ку, Ема кепысь, вӧв дом тшапкӧ — — Ставыс ыджыд, ачыс гыж кодь! — Олан вылан! Кытчӧ ветлін? — Мун, эн сёрнит... Кытчӧ мӧдін!.. — Зэв тай скӧр тэ! Кытчӧ ветлін? — Турунла... Эн сӧр, кор тӧдан! — Кытысь пескыд? — Дерт жӧ вӧрысь. Батьӧ кералӧ со, кылан? (Керасьӧм шы кыліс бӧрысь.) Вот тэныд и олан-вылан!.. — Аттӧ, кутшӧм!.. Гортад уна-н? — Керкатыр тай эськӧ сёйысь, Уджавнысӧ кыкӧн мунам, Нывъясыд тай абу збойӧсь... — Вот кыдз! Но, а нимыд тэнад? — Ласей. — Сідзи. Висьтав, тэныд — Кымын арӧс? — Сизим тырас Скӧт праздникӧ... Но да тырмас!.. Тшайкок, вӧрзьы! — Дом пом босьтіс, Вӧвлы водзӧ ордым восьтіс.
