ЯНСӦДЧӦМ

Майбыр томдырйи,
Сьӧлӧм пуигӧн
Став лов вир-яйнам
Нылӧс радейтлі.

Синмас видзӧдлан —
Юрыд бергӧдчӧ,
Чужӧмбан вылас —
Ӧзйӧ сьӧлӧмыд.

Мича дзоридзӧсь
Вадор видзьясӧй,
Вевтас ыбъясӧй,
Ылі пармаӧй,

Тувсов асывводз,
Рытъя кыаӧй,
Вӧт кодь войясӧй,
Мый ті сы водзын?!

Вывті гажа-сь ті,
Кодыр ӧтнадӧн,
Кодыр тіянӧн
Гажтӧм пальӧдан.

Но а сы дырйи?..
Ставныд веськодь! Сэк
Тӧлыс — тулыс кодь,
Войыс — мича лун!

Ог ме вунӧдлы,
Кыдзи медбӧръя-сь
Сылы шуи ме:
«Эн бӧрд, мусаӧй!

Сідз нин, тыдалӧ,
Сідз нин шуӧма...
Ӧні янсӧдчам,
Коркӧ аддзысьлам». 

Муртса шуи сідз —
Ӧзйис чужӧмыс...
Сэсся кельдӧдіс
Лым кодь еджыдӧдз...

Да кыдз сыркнитчас,
Йӧй моз бӧрддзас друг...
Кутас сьывйӧдым,
Ӧшъяс морӧсӧ...

«Энлы, эн на мун!
Недыр лэдз менӧ
Гажтӧм пӧдтыны,
Шогӧс бӧрдӧдны

Медбӧръясьыссӧ,
Сьӧлӧмшӧр менам!..»
Лолӧй тупкысис...
Кылӧй эз артмы...