КОР МЕНАМ СЬӦЛӦМӦЙ НӦЙТЧЫНЫ ДУГДАС

Кор менам сьӧлӧмӧй нӧйтчыны дугдас,
Кодыр ме ловъяысь ловтӧмӧ пӧра,
Сэк кежлӧ тіянлы, сё муса другъяс,
Дась югыд вежӧрнам со мый ме сӧра:
Дзоляник ю бердын зымвидзӧ слуда.
Пӧлӧныс вӧр быдмӧ — читкыля пожӧм,
Юр йылас кымынкӧ му сю да, ид да,
Гажӧдчӧ том йӧз сэн тулыс да гожӧм.
Горулас увтасыс лудъя да вӧра,
Йирсьӧны, ворсӧны кукъяс сэн, чибъяс,
Чукльӧдлӧ-мукльӧдлӧ ю, быттьӧ дӧра,
Гӧгӧрыс кыптӧны вевтасъяс — ыбъяс.
Ыб вылын, боръясын пӧвъяслӧн крестъяс,
Кӧнсюрӧ лайковъяс, вӧрсялӧм сёнъяс,
Бокшаӧ пуксьӧмась чача кодь грездъяс,
Став саяс — парма лӧз, — чуксалӧ: зонъяс!
Татчӧ ми, челядьяс, волывлам вӧлі
Чукӧрӧн: оз сёям, шыбласям изйӧн,
Ньыв пу йыв гӧрддзам да вуж перъям ньӧвлы,
Мыйыськӧ повзям кӧ — гортӧдз пыр пызъям!..
Вӧт моз тай кольӧма кад сійӧ ылӧ...
Дас квайт ар вудж мысьтӧн, вой кор оз узьсьы,
Сьӧлӧм кор чуксасьӧм кутшӧмкӧ кылӧ — 
Кыасянь кыаӧдз гаж сэні судзсьӧ.
Ӧткӧн-ӧ, унджыкысь чукӧрӧн, ныв-зон,
Гажаин слудаысь ми вӧлі тӧдлам:
Ӧткӧн кӧ видзӧдан, колипкай кывзан,
Унаӧн веськыда кольпавны мӧдлам!
Муртса тай пуксьывлӧ тувсовъя войыд;
Пӧтка моз шеныштас зарни борд рытсянь.
...........
Кысянь нӧ пуксьыліс? Лэбзиссӧ кытчань?..
Вунӧма кад миян, сьылам да горзам,
Кытчӧдз оз ёдіюр чуксасьны понды.
Унаысь дугӧдлӧ миянлысь ворсӧм
Пу йывсянь серавлысь яндысьтӧм шонді!..