ТУВСОВ ВОЙЯС

Шонді саявны
Кутіс вӧр улӧ,
Быри вынйӧрыс,
Пырӧ му вежӧ.
Кусӧ медбӧръя
Югыд визьторйыс,
Гӧрдов кыалӧн
Зарни югӧрыс.
Лӧзов енэжсянь
Рутор лэччӧма,
Югыд лысваӧн
Мусӧ вевттьӧма.
Гажа ывлавыв
Дзикӧдз лӧньӧма,
Лунтыр койтӧмысь
Быдӧн пӧтӧма.
Югыд тувсов вой
Дэбыд му вывті
Лӧня лэбалӧ,
Еджыд ру пӧвстын
Васа чери моз
Шытӧг суналӧ.
Лӧзов енэжын
Кельыд югӧрӧн
Тӧлысь дзирдалӧ.
Лӧньӧсь, югыдӧсь
Тувсов войясӧй,
Сӧмын воланныд
Ӧти сутш кежлӧ.
Онӧ рӧмдылӧй,
Онӧ вуджӧртлӧй
Онӧ пемдӧдлӧ
Мича му эжсӧ.
Мусӧ видзанныд
Ёна сотчӧмысь,
Мича дзоридзсӧ
Дзикӧдз косьмӧмысь.
Пу кост ордым моз
Тэ пыр тыдалӧ,
Мый жӧ му вылын
Сэки дивуйтчӧ.
Лӧня узьӧны
Гажа расъясыс,
Паськыд ыб вылын
Нюдза вежӧдӧ
Тувсов кӧдзаяс.
Зарни сильӧяс
Вадор бадь пӧвстын
Куткырвидзӧны.
Мыла гӧлӧсъяс
Недыр дзольгӧмысь
Вой шӧр ланьтӧны.
Гажа, югыдӧсь
Тувсов войясӧй;
Ӧтчыд во вылын
Ті ӧд овланныд.
Кыдз тай бобувъяс,
Муртса чужланныд,
Ӧти сутш бӧрти
Регыд кусанныд.