БИПУР ДОРЫННьӧжйӧник чусалӧ бипур, Лэчыда печлӧдлӧ кинь. Пӧрысьӧс босьтӧма вугыр,* Йирмӧгла сяркӧдчӧ пинь. Сьӧд войӧ лӧньӧма-сь пуяс, Тӧдчыштӧ би дорса вӧр. Гӧгӧрыс сывтыръя козъяс, — Быттьӧкӧ ичӧтик йӧр. Узьмӧдчис би дорӧ пӧрысь, Резювйӧ ӧшӧдіс кыс,* Вольпасьсӧ лӧсьӧдіс нитшкысь, Шебрасыс — пашкыръя лыс. Чӧскыда унмовсис сійӧ, Долыда шобрӧдлӧ вӧт. Пармаас нэмсӧ нин олӧ, Пармаысь перйысьӧ пӧт. Би дорын кывзысьӧ Катшыс: Оз-ӧ пӧ матысмы ош... Катшысыд некор оз лэдзлы Малыштны пӧрысьлысь тош. Шы ни тӧв вӧр-пуыс узьӧ, Ун йывсьыс сялькӧдчӧ ёль. Улиса лысваыс усьӧ, — Лысъясӧ ӧшъялӧ моль. Асывводз тӧвзьысис ывла, Пуркӧдны мӧдӧдчис лым. Легмуні нёрӧма вужъя, — Шняпкысис юр вылас — зым. Тӧдлытӧг пӧрысьыд кулі, — Юр кышсьыс прысьнитіс вем. Би дорын гашкӧ нӧ чужліс? Би дорын помаліс нэм. ........................................ Майбырӧй, би дорын олӧм! Дзӧргӧмӧй, чӧвтлытӧг син. Турдігӧн кусӧмысь полӧм. Жар дырйи тӧвзьӧмысь кинь. Тэ бердын гажыс и шогыс, Тэ бердын шонавлӧ ныр. Куслытӧг ӧтмоза помысь, Чусалан му вылын дыр. Тэ гӧгӧр нывъяс да зонъяс... Кор нӧрысысь мыччысяс луд, Сьылӧны тувсовъя войяс... Му вылас медыджыд шуд! Анягур сотігӧн челядь Дзользьӧны рытгорув дыр. Би моз жӧ ӧзйӧны челядь, — Шудныс тай юр вывтыс тыр! Тэ дорын тувсалысь шонтӧ Ва пиысь петмысти ки. Би дорын чешъялӧ, ёнтӧ, Пыдзрасьӧ войвывса пи. Сэзь войын тэ бердӧ водӧ Сійӧ жӧ кутюшка* морт. Косьмӧм мысть ун йывсьыс сотчӧ, Оз аддзыв, коньӧрӧй, горт. Тэ дорын кыйсьысьлӧн олӧм, Тэ дорын колльӧдӧ вой. Лямӧдлӧ унаӧс пожӧм... Тӧдлытӧг личӧдас сой. Тэ бердын гажыс и шогыс. Тэ бердын тільсям ми пыр. Куслытӧг ӧтмоза помысь Чусалан войвылын дыр.
