РЕДАКЦИЯСЯНЬ

Ӧкмыс во коли Сӧвет власьт лоӧмсянь... Ӧкмыс во сайын Россияса рабочӧй да крестьяна босьтісны ас кианыс олӧмсӧ да босьтчисны асьныс аслыныс выль олӧм дорны.

Ӧкмыс во сайын коми йӧз тшӧтш босьтчис лӧсьӧдны аслыс выль бур олӧм. Коми йӧз тайӧ вояснас ёна водзӧ тувччис.

Быд йӧзлы тайӧ выль олӧмсӧ лӧсьӧдігӧн ёна отсасьӧ печатнӧй гижӧд (газетъяс, журналъяс да нигаяс). Гижӧд пыр ми велӧдчам ассьыным овмӧс кыпӧдны, бурджыка олӧмнымӧс лӧсьӧдны, вежӧрнымӧс сюсьмӧдам, тӧдмӧдам асланым олӧмӧн мукӧд йӧзӧс, тӧдмалам олӧмсӧ мукӧд государствоса войтырлысь и с. в.

Сӧмын колӧ, мед гижӧдыс вӧлі ас гӧгӧрвоана кыв вылын. Миян, коми йӧзлӧн, ӧнӧдз зэв на этша вӧлі коми кыв вылын печатнӧй гижӧд: быд вежонын петӧ вӧлі ӧти нумер газет да быд во петӧ вӧлі 10–15 дзоляник коми нига.

Газетад он вермы быдтор йылысь лючки гижны — газетад кузя гижӧдъясыд оз тӧрны; сэсся газетыд регыд косясьлӧ, вошласьӧ.

Торъя нигаяс быдтор йылысь огӧ на жӧ вермӧ ӧні лэдзны — гӧльӧсь на ми.

А гижны колӧ унатор йылысь дай кузьджыка да лючкиджыка.

Сідзкӧ, ӧні кежлӧ коми йӧзлы зэв колантор — корсюрӧ (быд тӧлысьын) лэдзны шӧркоддьӧм нига ыдждаӧн коми журнал. Сэтчӧ мед вӧлі комиӧн гижӧма коми йӧзлы, коми крестьяналы уна колантор йылысь да бура-лючкиа.

«Ордым» журналным миян татшӧмкодь и лоӧ.

Сэтӧн пондам гижны со мый йылысьджык:

1) Кутшӧма мунӧ олӧмыс да выль бур олӧм дорӧмыс Сӧвет Республикаясын да миян Обласьтын; кутшӧм гырысь уджъяс талун кежлӧ да аски кежлӧ сулалӧны коммунист партия водзын да став уджалысь йӧз водзын.

2) Кутшӧма олӧ миян сикт да кыдзи сэтӧн олӧмсӧ да овмӧссӧ регыдджык да кокньыдджыка бурмӧдны-лэптыны: видз-му уджалӧм бурмӧдӧм йылысь, бура скӧт видзӧм йылысь, вӧралӧм йылысь, быдсяма мукӧд сиктса уджъяс йылысь; висьӧмъясысь бурдӧдчӧм йылысь да висьӧмъясысь видзчысьӧм йылысь; выль ногӧн олӧм лӧсьӧдӧм йылысь, велӧдчӧм-югдӧдчӧм йылысь да уна мукӧдтор.

3) Кутшӧм колӧ миян сиктъясын кооперативъяс, тӧвариществояс да мыйӧн найӧ бурӧсь, мыйла найӧ колӧны; кыдзи бурмӧдны-паськӧдны налысь уджсӧ.

4) Мыйла колӧ коми литература (коми мича гижӧдъяс), кутшӧм литература миян эм нин, кыдзи колӧ бура-мичаа гижны комиӧн, кутшӧм уджъяс КАПП водзын, кыдзи да мый вӧчӧны коми гижысьяс да КАПП, кыдзи найӧ аслас мича гижӧдъяснас коми йӧзӧс гажӧдӧны да чуксалӧны водзӧ, бур олӧмлань.

5) Мыйсюрӧ йылысь посньыдик гижӧдъяс.

Тайӧ ставыс зэв колантор коми йӧзлы, коми крестьяналы, коми сиктса роботникъяслы... «Ордым» водзын зэв ыджыд удж. «Ордым» оз вермы уна пӧльза вайны, оз кӧ сэтчӧ пондыны гижны миян водзмӧстчысьяс да водзынджык мунысь войтыр: велӧдчӧм йӧз, олӧмсӧ бура тӧдысьяс, выль олӧм вӧсна тӧждысьысь войтыр, коми гижысьяс да му бердын уджалысь крестьяна.

Ӧні миян тыри 9 во Октябрса революциясянь. Ёна быдмим тайӧ 9 вонас, ёна водзӧ тувччим выль бур олӧмлань; ёна уна вӧчим ассьыным овмӧс лэптӧм кузя да вежӧр сюсьмӧдӧм кузя; ёна уна коми гижысь петі тайӧ 9 воӧн, ёна найӧ садьмӧдісны асланыс мича гижӧдъяснас коми йӧзӧс да чуксалісны-отсалісны налы тувччавны водзӧ, бур олӧмлань.

Асланым коми журнал пыр, ордымӧд моз, нӧшта ӧдйӧ да чорыда, Ленин индӧдъяс серти да коммунист партия бердӧ топӧдчӧмӧн, пондам коми йӧзӧс нуӧдны водзӧ, выль бур олӧмӧ.

Чуксалам коми войтырӧс лыддьыны ассьыныд журналтӧ!

Чуксалам быдӧнӧс гижны журналӧ!