* * *

...вӧрыс помасис,
ыбъяс воисны...
Вичко ньӧжйӧник руысь кыпӧдчӧ...
Бара гортын ме.
Ӧдйӧджык! Ӧдйӧджык!
Регыд тыдовтчас мамлӧн керкаыс.
Сӧмын синъясӧй быттьӧ ӧшйисны —
вичко стенъясыс
быттьӧ зэр бӧрын... Рудӧсь...
Сиктті прӧйдиті. Югыд краскаяс.
Локті матӧджык. Видзӧдлі...
Менам видзӧдлас муніс вичко пыр —
эг тай аддзы ме вичколысь синъяссӧ.
...Стенмас потасыс курыда нюммуніс:
«Со, эн дивит пӧ, татшӧм лои да...
Вӧлі коркӧ и менам томлуныс —
йӧзыс волісны, эг кыв элясьлӧм.
Гашкӧ, енмыслы налӧн эскӧмыс
менам мичлунӧн вӧлі чужтӧма.
Кадыс мунӧ тай...
Коркӧ
челядьсӧ эз кутны вайӧдны.
Налӧн выль олӧм лоӧ пӧ.
Бур!
Коркӧ челядьыс ӧтнаныс локтісны...
Изъясӧн...»