ТУВСОВ ЛУНӦ

Ӧшинь улын, льӧм куст пиын
Мича кай сьылӧ.
Мӧдлапӧлын, видзьяс вылын
Кӧк кӧкӧм кылӧ.
Эжва вывті, бадь куст дорті
Чери кыйысь шлывгӧ.
Сёйны чипан корсьӧ варыш, — 
Муяс вывті шывгӧ.
Эжва дорын, буджӧд йылын
Посни челядь зёльзьӧ,
Кильчӧ вывсянь найӧс вердны
Ёна мамыс горзӧ.
Ӧшинь улын, муяс вылын
Чипан ёна тюрзӧ,
Житник дорын, аслас позйын
Кутян мыйкӧ пурсьӧ.
Карта сайын, дзоля йӧрын
Ёна кылӧ мӧс баксӧм.
Ывла вылын, вӧлӧсьт шӧрын
Сӧмын кылӧ йӧз ваксьӧм.
Градъяс вылын, куйӧд пиын
Нырнас гӧрӧ порсь, руксӧ.
Аслас позсянь лэбӧ рака,
Гӧрӧм му вылӧ пуксьӧ.