ЛӦСЬӦДЧӦЙ КӦДЗӦМ КЕЖЛӦ
Матысмӧ кӧдзан кад. Ковмас уна пӧлӧс да бур кӧйдыс. Уна нин миян крестьяниныд дугдіс куш ид да сю кӧдзӧмысь, кутіс кӧдзавны анькытш, вика, клевер да мукӧд сикас быдтасъяс. Унджык кутіс пуктыны картупель да скӧт вердан сёркни. Кольӧм вося омӧль во помыд крестьянинлы петкӧдліс: куш нянь вӧдитӧмӧн ыджыда овмӧс кыпӧдны он вермы, колӧ тай нин вӧлӧм заводитчыны вӧдитны унджык скӧт вердан быдтасъяс, колӧ унджык лӧсьӧдны, быдтыны вузаланторъяс. Ӧні уналаын нин крестьянин казяліс: колӧ пӧ тай вӧлӧм кутчысьны выль ногӧн, агрономия висьталӧм кузя заводитны уджавнытӧ.
Мед крестьянинлӧн овмӧсыс ӧдйӧджык кутіс кыптыны, колӧ сылы ӧні ёнджыка заводитны велӧдчыны, ёнджыка юасьны агрономъяслысь, водзвыв лӧсьӧдны план, кутшӧм удж да кор сійӧс вӧчны.
Ӧні тулысын крестьянинлы медъёна колӧ кӧйдыс понда тӧждысьны. Мый кӧдзан, сійӧ и вундан. Лёк кӧйдысӧн кӧ кӧдзан, лёк и урожай босьтан. Медводдза удж крестьяналӧн — бур кӧйдыс лӧсьӧдӧм. Бур кӧйдыслы колӧ лоны, мед сійӧ вӧлі бура чужӧ, эз вӧв ёг турун кӧйдыс сора, мед вӧлі миян климатын бурджыка воӧ. Ёг турун кӧйдыс ид пиысь позьӧ торйӧдны кӧйдыс весалан машина пыр лэдзӧмӧн. Тайӧ уджсӧ быд крестьянинлы колӧ ӧні жӧ вӧчны. Мед ни ӧти кӧйдыс тусь эз вӧв кӧдзӧма весавтӧг.
Таво уналаын кӧйдысысь ёна тӧждысьӧны, уналаын кӧйдыс оз тырмы. Крестьянинлы колӧ тӧдны — кӧдзан машинаӧн (рядовая сеялка) кӧдзӧмӧн пуд пыдди тырмӧ 25–30 пунт.
Ёна таво колӧ кутчысьны уна картупель вӧдитӧм бердӧ. Картупельыд ӧд, нянь сертиыд, сетӧ пӧтӧссӧ куим либӧ нёль пӧлӧн унджык.
Оз ков вунӧдны унджык шабді кӧдзӧм понда. Шабді кӧдзӧмыд крестьянинлы сетӧ докод.
Ӧнісянь жӧ колӧ мӧвпыштны турун кӧйдыс да скӧт вердан сёркни кӧйдыс ньӧбӧм йылысь. Эновтчан кӧ сёр тулысӧдз, верман кӧйдыстӧг кольны. Тайӧ кӧйдысъяссӧ вузавлӧ Сельпромкредитсоюз.
Кӧні ӧнӧдз на абу плугъяс да зигзаг пиняяс гӧрӧм-кӧдзӧм кежлӧ, найӧс Сельпромкредитсоюз пыр жӧ колӧ ньӧбны. Гӧрйӧн гӧрӧм да пу пиняӧн пинёвтӧм (агсасьӧм) колӧ нин шыбитны.
Тайӧ нумерас ми гижим вель уна индӧдъяс тавося гӧрӧм-кӧдзӧм кежлӧ. Индӧдъясыскӧд колӧ тӧдмасьны да сы серти и зільны таво видз-муястӧ кӧдзны.
