КОЛӦ ТӦДНЫ КОМИ ГИЖЫСЬЯСӦС

Коми йӧз оз тӧдны ассьыныс коми гижысьяссӧ. Оз тӧдны, кымын гижысь эм, коді кӧні да кутшӧма олӧ, коді кӧні чужлӧма, коді кыдзи быдмылӧма-овлӧма, кыдзи заводитӧма гижны, сідзи водзӧ.

Та йылысь колӧ тӧдны быд коми мортлы, коді лыддьӧ коми литературасӧ. Ми олӧмсӧ кӧ тӧдам гижысьыдлысь, кокньыдджыка вермам тӧдмасьны гижӧдъяснас, кокньыдджыка велалам сылысь висьталӧмсӧ.

КАПП тайӧ уджас босьтчӧ. Сійӧ кӧсйӧ тӧдмӧдны коми йӧзӧс коми гижысьяскӧд. КАПП кутас «Ордым»-ын вочасӧн быд №-ын лэдзны биографиянысӧ (олӧм йылысь гижӧд) коми гижысьяслысь.

КАПП-са шленъясӧс быдӧнӧс корам ыстыны миянӧ гижӧдсӧ асланыс олӧм йывсьыс (автобиографиясӧ) дай фотографическӧй карточкасӧ. Коді тӧдӧ кутшӧмкӧ коми гижысь олӧм йывсьыс, корам жӧ гижны миянлы.