ПЕТЫР ТУНМиян сиктын, миян грездын Оліс бура Петыр тун, Ноксис сійӧ пыр йӧз пытшкын, — Оз тай нажӧвитны мун... Пемыд йӧзтӧ пӧрйӧдлыштӧ: Ме пӧ прамӧй лекар морт... Коді корліс Петыр другтӧ, Сылы лои вӧчны горт. Петыр тунлӧн вӧлі другыс Горт вӧлӧсьтас Микул поп... Поплӧн дари лекарствоыс, Петыр мортлӧн — турун ноп... Гриша дядьлӧн ӧтчыд висьмис Доймӧм помысь веськыд бок... Петыр ордӧ тьӧтӧ муніс, Нуис сьӧрсьыс кӧлуй ноп. Петыр тун тай дыр эз ыждав, Кыдз оз ыждав корӧм гӧсьт, Маръя тьӧтлы «лекар» шуис: «Ещӧ самӧкур, мун, босьт». Ачыс Гришӧ ордӧ локтіс, Пыр жӧ ломтіс пывсян гор. Пӧсь ва пывсян гор пыр лэдзис, Нопйысь пуктіс турун кор. Сэсся Гришӧ дядьлы сетіс Лекарствосӧ чашка тыр... Гришӧ дядьӧ мыйӧн юис, Висьӧм ӧдіс пырысь пыр... Сэсся вит лун мысти лои «Бурдӧм» Гришлы вӧчны горт.
