ГЫМНЬӦВ
(Февральса революция)

Вӧлі война гыпкӧ —
	Чорыда гымалӧ;
Гӧгӧр сьӧд тшын кыптӧ — 
	Курыда тшыналӧ, — 
		Йӧз кутіс пӧдны,
		Оз вӧлі тӧдны — 
			Кор волас пом?
Вӧлі морт вир киссьӧ — 
	Визувтӧ шоръясӧн;
Чорыд муыс нильзьӧ — 
	Вынсялӧ шойясӧн, — 
		Сар вӧсна сюрсӧн
		Пуктісны юрсӧ
			Пӧрысь и том.
Вӧлі Питер карын
	Дума сэк думайтӧ...
Вӧлі Микол сарыд
	Гажӧдчӧ-гуляйтӧ:
		Усьтӧдзыс юӧ,
		Карзӧмӧн нуӧ
			Шой вылын пир.
Лёкыс куим воӧн
	Кӧкъямыс тӧлысьӧн
Вывті уна лои — 
	Йӧз вылӧ кӧласис, — 
		Омӧльтчис олӧм,
		Гудыртчис сьӧлӧм,
			Пузьӧдчис вир.
Шогыс петіс ортсӧ
	Уджалысь войтырлӧн — 
Мӧда-мӧдкӧд орччӧн
	Сувтісны котырӧн, — 
		Кыпӧдчӧм шысьыс
		Здрӧгнитіс-шызис
			Столица-кар.
Ыджыд, чорыд гымӧн
	Россия сыркнитіс;
Сарӧс лыйис гымньӧв — 
	Престолсьыс пыркнитіс, — 
		«Великӧй Русьын»
		Турбыльтчис-уси
			Вир юысь сар.
Вӧлі сарскӧй дума
	Питерын думайтӧ...
Бур йӧз ноксьӧм шумӧ
	Эз дыр зэв думайтны — 
		Босьтісны власьттӧ
		(Кокньыд ӧд дасьтӧ!)
			Горш озыр йӧз.
Вӧлі Октябр тӧлысь;
	Чорыд гым бергӧдчис,
Озыр власьтыд вӧлись
	Нэм кежлӧ чергӧдчис:
		Путкыльтчис важыс,
		Овмӧдчис гажа
			Уджалысь йӧз.
Талун дас во тыри
	Йӧй сарӧс чӧвтӧмлы;
Миян вылӧ пыр на
	Буржуйяс лӧвтӧны:
		Ыстӧны «нота» — 
		Ставсӧ пӧ сотам.
			Сӧветлы пом!...
Пыр на крука гыжъяс
	Кырнышъяс кеслӧны,
Сэ-Сэ-Сэ-Р-лысь «мыжъяс»
	Пузувтны кӧсйӧны, — 
		Колӧкӧ, — волӧй,
		Огӧ зэв полӧ — 
			Сэ-Сэ-Сэ-Р ён!