КУЛИГАНИТӦМ ЙЫЛЫСЬ

Мый сійӧ лоӧ кулиганитӧмыс? Мыйла Сӧвет власьт сыкӧд вермасьӧ.

Кулиганитӧмыд вермас лоны уна ног. Кулиганъясыд быдлаысь аддзӧны аслыныс «уджсӧ»: ывлаын, керкаын, лыддьысян керкаясын, мукӧдлаын. Эмӧсь кулиганъяс пӧвстад том йӧз, эмӧсь и пӧрысь йӧз.

Со, шуам, том йӧз праздник дырйи юыштасны, коддзасны, мунӧны улич кузя матькигтырйи, горзігтырйи. Паныд сюрысьясӧс кучкалӧны, бокӧвӧй кӧть ас морт сэсся — налы ӧткодь, либӧ кутасны ӧшиньяс пазӧдавны сиктъясысь.

Бара жӧ, шуам, лыддьысян керкаын прамӧй йӧз спектак кежлӧ лӧсьӧдчасны, видзӧдысь йӧз локтасны тырыс. Кулиганъясыд и сэні оз узьны, абу налы яндзим, кутасны серавны, горзыны, дӧзмӧдчыны ворсысьяслы. Бӧрыннас сэсся ставсӧ торкасны, кусӧдасны бисӧ да кутасны став йӧзсӧ вӧтлавны да кучкавны.

Либӧ ещӧ нин омӧль, пеж овлӧ кулиганитӧмыд — нывбабаясӧс сильничайтӧм.

Тайӧ висьталӧмъяс сертиыс позьӧ нин гӧгӧрвоны, кутшӧм мыжъяс вӧчӧны кулиганъясыд став йӧзыслы. Сійӧн Сӧвет власьт ёна чорыда кутчысис тайӧ омӧльсӧ бырӧдны. Бырӧдны кулиганитӧмтӧ позьӧ кык ногӧн: ӧти-кӧ, суд пыр, мӧд-кӧ, югдӧдчан удж паськӧдӧмӧн.

Судыд кулиганъястӧ ӧні чорыда судитӧ, пуксьӧдны вермӧ кык воӧдз. Сюрас кӧ кулиганитӧмысь кодкӧ кыкысь, либӧ унджыкысь, сійӧс судыс вермӧ ыстыны вит воӧдз мӧд губерняӧ. Сӧмын ӧд ӧтнаныс судъясыд да милицияыд оз вермыны кулиганъястӧ бырӧдны, кытчӧдз став йӧзыс оз кутны отсавны налы. Дерт, став йӧзыслы колӧ тайӧ омӧльсӧ вужнас бертыштны, мед миянын сійӧ эз вӧв.

Югдӧдчан удж пыр вермасьны кулиганитӧмыдкӧд позьӧ сідзи: колӧ велӧдчӧм йӧзлы сиктъясын да грездъясын ёнджыка кутчысьны уджавны гӧрд пельӧсъясын, лыддьысян керкаясын, сэні лӧсьӧдавны кружокъяс: военнӧйӧс, видз-му уджаланӧс, мукӧд пӧлӧсӧс. Колӧ унджык судзӧдны газетъяс, журналъяс да лыддьыны гора йӧзлы. Том йӧзсӧ колӧ чукӧртны сійӧ кружокъясас, мед позис налы колльӧдны кадсӧ мичаа да гажаа.

Иву Василь.