МИЯН МОГЪЯС
Миян коми сиктад важ олӧм пӧвстас пыр ӧтарӧ пырӧ выльсяма олӧм. Пырӧ ньӧжйӧник эськӧ, дырӧн, да топыда пуксьӧ. Унаысь сійӧ важ олӧмыскӧд сорласьлӧ, унаысь пӧдлӧ. Да сэсся бӧр жӧ петӧ важ олӧм веркӧсас, збоя швичкӧ-мунӧ сэті, ас бӧрсьыс пыр ӧтарӧ кыскӧ унджык йӧзӧс. Лунысь лунӧ выльсяма олӧм содӧ, сӧвмӧ, лунысь лунӧ йӧзыс чорыдджыка кутчысьӧны сэтчӧ, кыссьӧны сылань, мунӧны югыдлань.
Ён отсӧг выльсяма олӧмлы вермасьны став важ лёкыскӧд сетӧны коми сьыланкывъяс. Коми йӧз ас коми сьыланкывъяснас гажӧдчӧны, долыдмылӧны, ӧтпырйӧ тшӧтш тӧдлӧны — кодарӧ, кыдзи-мый колӧ мунны. Сӧмын миян ӧнія, выльсяма олӧмлань чуксалан сьыланкывйыс зэв этша.
Революция бӧрын коми поэтъяс гижавлывлісны революция ногса сьыланкывъяс. Гижлісны, нинӧм шуны, унакодь. Сійӧ сьыланкывъясыс пырисны нин коми сиктад, юргӧны сэні. Сӧмын ӧд этша на, этша сійӧ! Оз тырмы.
Ӧні коми поэтъяс омӧля тайӧ уджас (сьыланкывъясас) босьтчӧны. Пӧшти некод ӧні оз гиж коми сьыланкывъястӧ. Колӧ артмӧдны тайӧ уджтӧ, босьтчывны чорыдджыка. Коми сиктса олӧмыд виччысьӧ ас кыв вылын сьыланкывъяс, сійӧс ёна радейтӧ.
Тайӧ здукын (тайӧ журнал №-ас) ми лэдзам вель уна частушкаяс. Частушкаясыд ӧд медкокниа, мукӧд ногса сьыланкывъяс дорысь, пырӧны йӧз пӧвстад, медкокни велӧдны сійӧс сьывнытӧ и. Ми тані огӧ кутӧ видлавны лэдзан частушкаяссӧ. Сӧмын шуам — абу гӧгӧрбок ставыс лючки да шыльыд, абу торъя ошкана. Абу жӧ, дерт, и шыбитана, торъя омӧльтана. Став частушкаыс (ӧти кындзи) тані том гижысьяслӧн, босьтчысьяслӧн на.
Водзӧ кежлӧ миян мог, частушкаяс кындзи, «Ордымын» лэдзавлывлыны тшӧтш мукӧд ногса коми сьыланкывъяс. Коми поэтъяслы колӧ босьтчывны збыльысьджык коми йӧзлы сьыланкыв сетан уджӧ.
Сэсся ми тайӧ журнал №-ын жӧ лэдзам неуна йӧз пӧвстысь чукӧртӧм сьыланкывъяс. Йӧз пӧвстса сьыланкывъястӧ ӧд чукӧртны ёна колӧ. Сы пыр ми вермам тӧдмавны коми йӧзлысь важ олӧмсӧ, мӧвпсӧ олӧм йывсьыс. Дерт, ми огӧ вермӧ лэдзны сэтшӧм сьыланкывъястӧ унаӧс (местаыс оз тырмы). Лэдзлывлыны сӧмын кутам ичӧтикаӧн, мед эськӧ тӧдмӧдны коми гижысьясӧс йӧз пӧвстсьыс босьтӧм сьыланкывъяснас. Коми гижысьясыдлы ӧд ёна колӧ тӧдмасьны йӧз пӧвстса сьыланкывъяснад, мед бурджыка вермасны гижны коми олӧм йывсьыс.
Ми корам быд коми мортӧс чукӧртны йӧз пӧвстса коми сьыланкывъяс, нӧдӧмъяс, пӧслӧвичаяс да ыставны миянлы «Ордымӧ». Дерт эськӧ, тайӧ уджыс медъёнасӧ инмӧ Коми му тӧдмалан обществолы, да сы понда нинӧм. Став чукӧртӧм сьыланкывъясыс — ӧти йӧртӧдӧ ӧд воасны.
