ТУРУНВИЖ ВӦТЪЯС1 Сыктывкарысь Косланӧ ветлӧ турунвиж поезд... Мыйла поездыс Турунвиж рӧма, Ме ӧнісянь тӧда, — Тайӧ поезднас Быд гожӧм Слӧбӧда сиктӧ ме мӧда. Слӧбӧда сиктӧ, Кӧн сикт гӧгӧр Туруна видзьяс, Слӧбӧда сиктӧ, Кӧн шензьӧдӧ вӧрыс Веж мичнас. Слӧбӧда сиктӧ, Кӧн мамӧ мен вольсалас Югыдвеж вольпась. Слӧбӧда сиктӧ, Кӧн вӧтъясӧй — Турунвиж войтъяс. 2 Этша аддзылі ме йӧзӧс, Кодъяс оз радейтны Корӧся пывсян. Но ёна этшаджыкӧн найӧ, Кодъяс радейтӧны йӧрны Корӧсь кор. Кор пӧжӧ шонді, Лӧддзыс-номйыс уна... ...Но кутшӧм чӧскыд кӧра Выль корӧсь гозйӧн тырӧм сарай сёр. 3 Пӧсь лыа вывті сэтшӧм лӧсьыд Кӧмтӧг Сӧдз валань восьлавны Да кывны, Кыдз йиджӧ кок пыдӧсӧ Югыд шонді-ма... Тан лунвыв саридз дорысь Ваыс менӧ ёнджык шонтӧ, Дай еджыд лыаыс тан — Небыд киа мам. 4 Вижа, гӧрда, лӧза Лои ваыс, — Визяорда джодждӧраяс Мозын ваын мыськӧ мамӧй. Вижа, гӧрда, лӧза Сӧстӧм посъяс. Визъялӧны посъяс вылын Вильыш ёсъяс. 5 Вӧлапас ягӧ Еджыд тшак вотны Пань помысь кылӧдчам ми. Тӧвруыс небыд, Мозыныс ота, Мудзӧм оз тӧдлы на ки. 6 Кӧть турун пуктанінным Миян абу ылын, Кайигкості умтӧдз апала ме турун кӧр. Баблӧн литовкаыс Сӧмын шургӧ-кылӧ... Менам думъяс — Кор нин лэччам бӧр. Тадзи вӧлі неважӧн на, Сӧмын: Челядь юрын — Купайтчӧмысь шог. Но а ӧні, Ӧні, Ӧні — Турун пуктӧм — Менам гожся мог.
