УНА СИКАС ЮӦРЪЯС
Селькозналог мынтӧм
Миян обласьтын январ 16-ӧд лун кежлӧ мынтӧмаӧсь тавося селькозналог 55.640 шайт — 26,93% став тавося селькозналогсьыс.
Медуна мынтӧма Сыктыв уезд (34,38%), сэсся Кулӧмдін уезд (29,24%), Емдінса уезд — 22,46%. Медэтша мынтӧма Изьва уезд — 14,62%.
А.
Ид кӧйдыс лӧсьӧдӧм.
Таво кежлӧ ид кӧйдыс Обласьтын лӧсьӧдӧны Обсоюз да Сельпромкредитсоюз. Кыкнаныс найӧ чукӧртӧмаӧсь ӧні кежлӧ 23.000 пуд. Унджык кӧйдыссӧ чукӧртӧны асланым Обласьтысь. Став обласьтлы таво кежлӧ ковмас ид да зӧр кӧйдысъяс 45.000 пуд.
Судзсьытӧм крестьяналы удждӧны сьӧм.
РСФСР кузя 1926–27 во вылӧ государствоса бюджетысь сетӧма судзсьытӧм крестьяналы удждӧм вылӧ 6.300.000 шайт.
Тайӧ став сьӧмсӧ юклӧма губерняяс да обласьтъяс костын.
Асланым вӧчӧм тракторъяс содӧны.
Тавося первойя кварталнас (октябр–декабрын) Ленинградын «Красный Путиловец» завод вӧчис 150 трактор.
Ставсӧ таво вылӧ заводыс кӧсйӧ лэдзны 5 сюрс трактор.
«Красный Путиловец» кодь жӧ трактор вӧчан завод лэптасны Сталинградын.
Воана удждысьӧмъяс разӧдӧм.
Государствоса воана удждысьӧмъяс миян обласьтын, тавося январ 1-ӧд лун кежлӧ, разӧдӧма 246.326 шайт дон. Та мындасӧ разӧдӧма финотдел пыр. Мыйта Госбанк разӧдлӧма, тані абу индӧма.
Бӧр босьтӧма йӧзлысь облигацияяссӧ (селькозналог мынтӧмӧн, строкыс тырӧм удждысьӧмъяс вештӧмӧн) 100 сюрс шайт дон гӧгӧр.
Ӧні ставыс воана удждысьӧм облигацияясыс учрежденньӧяс ордын да йӧз киын 170–175 сюрс шайт дон кымын.
М. Вересов.
Вӧчалам выль пабрик-заводъяс.
— Январ 9-ӧд лунӧ М.-Курскӧйса кӧрттуйса Ундол станцияын воссис выль пабрика. Тайӧ сӧвет власьт дырйи медводдза печкан пабрика лои вӧчӧма. Заводитлісны вӧчнысӧ колян во майын. Тайӧ заводас лӧсьӧдӧма 100 сюрс пабрикаса чӧрс. Выль печкан пабрика кутас сетны печкӧмторсӧ воӧн 250 сюрс пуд дай ассьыс тӧварсӧ мукӧд пабрикъяс серти вермыны кутас вӧчны донтӧгджык 10–12%-ӧн.
— Владимир губерня улын, Вязникиын заводитісны вӧчны выль ыджыд шабді кыан пабрика. Вӧчны кутасны тӧвбыд. Медыджыд корпусыс эштас октябр кежлӧ. Пабрика вӧчӧмыс сувтӧ кык миллион шайт саяс.
— Декабр 20-ӧд лунӧ воссис (заводитіс уджавны) зэв ыджыд электростанция — Волховстрой (Ленинград бердын). Электростанциясӧ вӧчӧмыс сувтіс ставыс 90 миллион шайт.
Горт гӧгӧрын отсӧгтор
Кыдзи тӧдмавны бур карасин. Бур, сӧстӧм карасиныд югыд, вижоват рӧма. Бур карасинысь оз пет торъя лёк дук.
Зэв тшӧкыда овлывлӧ: карасиныд пӧшти лампа тыр, а сійӧ зэв омӧля ломтысьӧ, либӧ ньӧти оз ломтысь. Унджыксьыс омӧля ломтысьӧ, карасинад эм мукӧд сир кодь сорласьӧмъяс да, кодъясӧс лампа питильыд оз вермы кыскыны.
Тӧдмавны карасинтӧ позьӧ со кыдзи: ичӧтик сулея дозйӧ кисьтны неуна карасин да сы мында жӧ сернӧй кислота, сэсся солькйӧдлыштны. Эм кӧ карасин пиад сирыс, карасиныд сьӧдӧдас, пуксьӧм кислотаыс лоӧ кизьӧр дӧгӧдь кодь рӧма... Сӧстӧм кӧ карасиныд, сэки сійӧ сӧмын неуна вижӧдыштас.
Мед карасиныд югыдджыка ломтысяс колӧ лампаад пуктыштны неуна сёянъясӧ пуктан сов.
Кыдзи пӧрысь чипан яй чӧскыдӧн вӧчны. Колӧ юрсӧ керавтӧдз кык лун чӧж вомас кисьтавлывлыны тшайнӧй паньӧн сёянъясӧ пуктан уксус.
Тадзинад чипаныд эськӧ лоӧ зэв ляб да нинӧм сы понда. Яйыс сы местаӧ лоӧ мича да чӧскыд, быттьӧ абу пӧрысь чипанлӧн.
