ВӦВЪЯС РЕГЫД ВОАСНЫ

Ми журналын, колян нумерас (3 №-ын) гижлім нин крестьяналы уджӧн вӧвъяс сетӧм йылысь. Ӧні вӧвъяс ньӧбалан да ваян уджыс мунӧ нин. Та вылӧ правительство сетіс миян обласьтлы 38 сюрс шайт да ещӧ 300 душ вӧвнас.

300 вӧвсӧ босьтӧм вылӧ Сельпромкредитсоюзӧн вӧчӧма Мӧскуаын договор. Тайӧ вӧвъяссӧ ваясны нёль пельын, нёль партияӧн. Медводдза партияыс воас Яткаӧ январ 25-ӧд лунӧ, медбӧръяыс март 1-ӧд лун кежлӧ.

Тайӧ 300 вӧв письыс унджыксӧ юкласны Сыктыв уездса вӧлӧсьтъясӧ, мыйкӧ мында Емдін да Кулӧмдін уездъясӧ; медводдза партиясӧ юкласны-сеталасны Луза ю бердса (в Прилузских) вӧлӧсьтъясӧ, бӧръя партияяссӧ вайигмозыс мукӧд вӧлӧсьтъясас.

Сетӧм 38.000 шайт вылас ньӧбасны 200 вӧв. Ӧні найӧс ньӧбалӧны жӧ нин. Тайӧ вӧвъяссӧ унджыксӧ (гашкӧ и ставсӧ на) сеталасны Емдін да Кулӧмдін уездса вӧлӧсьтъясӧ.

Сідзкӧ, миян обласьтувса крестьяналы уджӧн сетасны ставсӧ 500 вӧв. Сетавны кутасны сӧмын вӧвтӧм крестьяналы. Сеталасны вӧвъяссӧ водзвыв лӧсьӧдӧм инъясын (пунктъясын).

Кутшӧм вӧлӧсьтъясӧ кымын вӧв сетны, Обласьтувса Видз-му Управленньӧлӧн ӧні лӧсьӧдӧма нин. Быд вӧлӧсьтын, кодлы сетны вӧвъяссӧ, индаласны волісполком да, мӧда-мӧдлы отсасян комитет да, удждысян тӧварищество ӧтувъя чукӧртчылӧм вылын. Дерт, налӧн мог регыдджык тайӧ уджсӧ нуӧдны.

Кыдзи да кодлыджык вӧвъяссӧ юклыны, — индӧдъяссӧ ысталӧма волісполкомъясӧ.

Став вӧвсӧ юкласны тавося певраль да март тӧлысьясӧ.

Быд вӧв, шӧрсӧ кӧ доныслысь босьтам, сувтас 200 шайт гӧгӧр. Сетӧм вӧвъяссьыс крестьяналы лоӧ мынтысьны куим воӧн (куим вося строкӧн.) Первойя строкыс лоӧ мӧд во помас вӧв сетӧм лунсяньыс. Сэки лоӧ мынтыны 40% (40 шайт 100 шайт вылӧ) вӧв донсьыс. Мӧд строкыс тырӧ вӧв сетӧм лунсяньыс коймӧд во помас. Сэки ковмас мынтыны ӧстатки 60%-сӧ вӧв донсьыс. Уджӧнсӧ сетлӧмысь правительство босьтӧ воӧн 6% (6 шайт 100 шайтысь во чӧжысь).