МИЯН ПОТРЕБОБЩЕСТВОЯСЫН
Нювчим заводса потребобщество.
Став керкаыс лавка улас лыддьысьӧ 126, шленыс потребобществоын 161 морт, — 127,7% став керка лыдсьыс.
Пайыс 5 шайта. 144 мортлӧн пайсӧ мынтӧма вит шайтысь унджыкӧн. Став чукӧртӧм паевӧй капиталыс — 947 шайт да 25 ур, — быд шлен вылӧ воӧ 5 шайт да 88 ур.
Став бергалан сьӧмыс 1926-ӧд воын, октябр 1-ӧд лун кежлӧ вӧлӧма — 15.847 шайт, а куйланыс: кӧлуйын, пайясын да дона бумагаясын — 2737 шайт. Аслас потребобществолӧн сьӧмыс 7505 шайт, йӧзлӧн — 11079 шайт да 50 ур. Тӧварсӧ во чӧжнас бергӧдӧма 65303 шайт да 46 ур дон.
Куш барышсӧ во гӧгӧрся тӧвар бергӧдӧмсьыс босьтӧма 1312 шайт да 35 ур.
Межадорса потребобщество.
Шленыс октябр 1-ӧд лун кежлӧ лыддьысьӧ 319 морт, 464 керкаысь — 68,2% став керка лыдсьыс.
Пайыс — 5 шайта. 220 мортлӧн пайсӧ мынтӧма дзоньнас, мукӧдыслӧн абу на тыр. Став чукӧртӧм паевӧй капиталыс — 1450 шайт да 21 ур — быд шлен юр вылӧ воӧ — 4 шайт да 54 урӧн. Тӧварсӧ во гӧгӧрӧн бергӧдӧма — 41510 шайт дон. Вузасян рӧскод вылӧ тӧвар дон вылас содталӧмаӧсь 13%, а мунӧма став рӧскодыс вылӧ, тӧварсӧ вайӧм дон кындзи, 5,7 %. 7,3%-ыс кольӧма барыш вылӧ. Барышыс лоӧма 3091 шайт да 83 ур. Став эмбурыс октябр 1-ӧд лун кежлӧ вӧлӧма 8798 шайт дон, сэні асланыс сьӧм вося барышнас — 7461 шайт да йӧзлӧн 1337 шайт. Тайӧ зэв бур Межадорса потребобществолӧн.
1925–26 вузасян-бергӧдчан воас аслас сьӧмыс содӧма тавося барышнас 3322 шайт.
Ставыс эськӧ тайӧ бур да, вузасьысьыс таво абу судзсьӧма 255 шайт дон. Татшӧм омӧльторъясысь колӧ быд потребобществолы ёна видзчысьны, вужнас тайӧ лёксӧ нетшыштны.
Кык кывйӧн потребобществояс удж йылысь.
Косланса п. о.
Чинтіс йӧз вывсьыс уджйӧзсӧ 81% вылӧ. Тӧвар вылӧ содталан донсӧ лэдзис 13%-сянь 10,2 %-ӧдз. Уджыс муніс план серти.
Устьвачерса п. о.
Керка юр лыдӧн кӧ артавны, пырӧмаӧсь кооперативӧ шленъясӧ 95,5%. Ас кооперативса уджнас шленъясыс зэв интересуйтчӧны, сьӧлӧмсьыс ветлӧны шленъяс чукӧртчылӧмъяс вылӧ. Сідзнад сідз да, сӧмын кооперативлы уджйӧзсӧ оз мынтыны, кооперативыс немуличаӧ воан выйын.
Висерса п. о.
Правленньӧыс абу тшӧктӧма уджӧн некодлы тӧварсӧ сетавны да, прикащикыс ас наукнас сеталӧма. Шленъясыс чукӧртчылӧм вылын шуисны: мый дон уджӧнсӧ сеталӧма, став убыткасӧ ас вылас и йӧткыны.
Ыбса п. о.
Озыр, тӧвар уна, тӧргуйтӧны збоя. Правленньӧыс ыргӧн пӧртъясӧ яй солавлӧма да яйыс тшыксьыштӧма. Правленньӧ абу бӧбмӧма — вузалӧма яйтӧ ставсӧ дай ещӧ убыткатӧг. Мый вермис лоны ньӧбысьыскӧд, сёйысьыскӧд, правленньӧлы веськодь.
Глотовса п. о.
Потребобществоын правленньӧыс ни, ревизионнӧй комиссияыс ни абу уджавлӧмаӧсь. Сы вӧсна Обсоюзса инструктор видлалігас казялӧма щӧт нуӧдӧм сертиыс лотайтӧм. Правленньӧса шленсӧ да мукӧдсӧ сетӧма судӧ.
