ПОТРЕБОБЩЕСТВОЯСЛӦН РЕВИЗИОННӦЙ КОМИССИЯ ДА СЫЛӦН УДЖЫС
Мед эськӧ потребобществоясын юралысьясыс бура уджалісны, мед и щӧт нуӧдӧмыс вӧлі веськыд, быд во кежлӧ став обществоса шленъясыс чукӧртчылӧм вылын бӧрйыссьӧ ревизионнӧй комиссия. Мый позьӧ да мый колӧ тайӧ комиссияыслы керны, урчитсьӧ потребобществояс уставӧн, сэсся Обсоюзсянь индӧдъясӧн да туйдӧдъясӧн.
Веськыд ногӧн кӧ, ревизионнӧй комиссия дырйиыд потребобществоясын оз ков лоны кытчӧсюрӧ сьӧм лотайтӧм. Сідз-ӧ сійӧ? Абу, — сы туйӧд абу на гӧгӧр шань. Тшӧкыда на овлывлӧ потребобществоясысь сьӧм да тӧвар лотайтӧмъясыд.
Мыйла нӧ сэтшӧм лёкторсӧ вермӧны вӧчны кооперативъясса бӧрйӧм да медалӧм уджалысьясыс? Медъёнасӧ, дерт, омӧлик ревизионнӧй комиссияяс вӧсна.
Потребобществоса шленъясыс чукӧртчылӧм вывъясас оз бура артыштны ревизионнӧй комиссияӧ бӧръян шленъяс йывсьыс. Шленъяс чукӧртчылӧмъяс вылын аддзывлан со мый: бӧрйӧны правленньӧӧ шленъясӧс, а скодуйтчысьяс заводитчӧны разӧдчыны: «ми пӧ тай эг сюрӧ-а», быттьӧ сэсся налы нинӧм керны сэні. Кольччысьясыс бӧрйӧны ревизионнӧй комиссияӧ тшӧкыда кутшӧмсюрӧ йӧзӧс, омӧлика велӧдчӧмъясӧс, либӧ дзик велӧдчытӧмӧс, кодъяс сійӧ удж вылас оз туйны.
Ревизионнӧй комиссия бӧрйигӧн шленъяслы колӧ тӧд вылас уськӧдлыны, гӧгӧр артыштны кутшӧм удж вылӧ найӧ йӧзсӧ бӧрйӧны, сы серти сэсся и индавны, бӧрйыны.
Со кутшӧм колӧ лоны ревизионнӧй комиссияяслы аслыныс да найӧ уджныслы:
1. Ревизионнӧй комиссияӧ бӧръян шленыд мед вӧлі веськыд, кооперативса уджсӧ мед радейтӧ, мед прамӧя велӧдчӧма, вермис гӧгӧрвоны уджсямсӧ да ас кадын ӧлӧдны уджалысьяссӧ лёкторъяс вӧчӧмысь.
2. Ревизионнӧй комиссиялы жӧ колӧ видзӧдны тӧваръяс лавкаын да складъясын видзӧм вылӧ: мед эськӧ эз тшык да эз ло сы вӧсна убытка обществолы.
3. Ревизионнӧй комиссиялы колӧ быд 3 тӧлысь мысти видлавны став тӧварсӧ, быд тӧлысь мысти кассасӧ, мед оз нинӧм вошлась, кытчӧсюрӧ видзсьы-лотайтсьы.
4. Правленньӧлысь уджалан плансӧ колӧ тӧдмавны дай сы серти и уджалӧмсӧ видзӧдны, бурджык туйяс индавны.
5. Ёнджыка колӧ тӧждысьны тӧвар дон чинтӧм йылысь, ковтӧм рӧскодъяс бырӧдӧм йылысь.
6. Колӧ ревизионнӧй комиссиялы йитӧд кутны Обсоюзса инструкторкӧд, обсоюзса ревизионнӧй комиссиякӧд да вӧлӧсьтувса организацияяскӧд — сы сайын уна эм удж ладмӧмыслӧн.
7. Шленъяс чукӧртчылӧмъяс вылын колӧ висьтавлыны ревкомиссиялы аслас удж йылысь да правленньӧ удж йылысь: веськыда, чинтавтӧг, содтавтӧг, кыті уджыс бур да кыті омӧль; мӧда-мӧдӧс торъя личкӧм ни, увтыртӧм ни, ошкӧм мед эз вӧв — сыысь некутшӧм пӧльза абу.
8. Кооперативъясысь гусясьӧм да лотайтӧм зільӧны бырӧдны став уджалысь йӧзыс, государство. Ревизионнӧй Комиссиялы колӧ чорыда босьтчыны татшӧм лёксӧ бырӧдӧмӧ. Оз ков вунӧдны — ревизионнӧй комиссия сайын уна жӧ эм водзӧ вылӧ кооперативъяс паськӧдӧмын да ёнмӧдӧмын. Та серти кӧ, ыджыд и кыввидзны колӧ ревизионнӧй комиссиялы удж йывсьыс асьсӧ бӧрйысьяс водзын дай став Сӧвет власьт водзын.
Никс.
