ВЫЛЬ ЗАКОНЪЯС ДА ИНДӦДЪЯС
Сӧветъясӧ бӧрйысьӧм. Обисполком тшӧктіс таво бӧрйысян уджӧ босьтчыны декабр 15-ӧд лунсянь. Сэк кежлӧ быдлаын лӧсьӧдалісны бӧрйысян удж нуӧдан комиссияяс.
Декабр 20-ӧд лун кежлӧ колӧ вӧлі гижавны нимпасъяс, кодъяслысь мырддьӧма сӧветъясӧ бӧрйысян праваяссӧ.
Сиктса сӧветъясӧ да вӧлӧсьтувса сӧветъяс съезд вылӧ депутатъясӧс собранньӧяс вывъясын бӧръялӧны январ 15-ӧд лунӧдз. Вӧлӧсьтувса съездъясыс сӧветъяслӧн мунасны январын 15-ӧд лунсянь 31-ӧд лунӧдз.
Уездувса съездыс сӧветъяслӧн лоӧ нуӧдӧма певраль 20-ӧд лунсянь. Обласьтувса съезд сӧветъяслӧн чукӧртчӧ март 20-ӧд лунӧ.
Сӧветъясӧ бӧрйысьӧм кутас мунны СССР-са Центральнӧй Исполнительнӧй комитетӧн сентябр 28-ӧд лунӧ вынсьӧдӧм выль индӧд серти. Тайӧ выль индӧд йывсьыс ми гижлім «Ордым» журналӧ 1-я №-ӧ «лӧсьӧдчӧй сӧветъяс бӧрйигкежлӧ» статтяын (17-ӧд лист бок).
Гӧль крестьяналы уджӧн сетасны вӧвъяс. Миян обласьтлы гӧль крестьяналы вӧв лӧсьӧдӧм вылӧ правительство сетіс уджӧн куим во кежлӧ 95 сюрс шайт.
Сійӧ сьӧмыс вылӧ Обисполком шуис ньӧбны верстьӧ арлыда вӧвъясӧс 450 душ. Мезеньса да Печӧраса рӧдысь 150 вӧв, Урал обласьтувса войвывса округъяссьыс 300 вӧв.
Чуйдӧдны да видзӧдны вӧвъяссӧ крестьяналы сетӧмын тшӧктӧма Обласьтувса Видз-му Управленньӧлы; ньӧбавны да сетавны вӧвъяссӧ гӧль крестьяналы тшӧктӧма Сельпромкредитсоюзлы.
Вӧвъяссӧ сеталасны гӧль овмӧса крестьяналы, кодъяслӧн абу вӧвныс да кодъяс вермасны дай кутасны уджавны сійӧ вӧвнас кер-шпал бердын.
Кытчӧ мыйта вӧв колӧ, тӧдмалӧны волісполкомъяс пыр да мӧда-мӧдлы отсасян комитетъяс пыр.
Селькозналогса недӧимка йылысь РСФСР-са Совнарком шуӧм серти, колян вося дай воддза воясса селькозналогысь недӧимкасӧ ӧтка крестьяна овмӧсъясысь, дзикӧдз кӧ нин найӧ оз вермыны мынтыны недӧимкасӧ, вермӧны шыбитны ставнас либӧ мыйкӧ мында вӧлӧсьтувса налогӧвӧй комиссияяс, налог мынтысьысьӧн шыӧдчӧм сетӧм кузя.
Вӧлӧсьтувса налогӧвӧй комиссияяслӧн шуӧмъясыс недӧимка шыбитӧм йылысь пырысьтӧм-пыр вынсялӧны дай вӧчсьӧны, недӧимкаыс кӧ 5 шайта либӧ этшаджык. Вит шайтысь кӧ унджык недӧимкаыд, сійӧс шыбитӧм йывсьыс вӧлӧсьтувса налогӧвӧй комиссиялӧн шуӧмыс вынсялӧ сӧмын уездувса финанс юкӧдӧн видлалӧм бӧрти.
Быд шыӧдчӧм видлалігӧн вӧлӧсьтувса налогӧвӧй комиссияяслы недӧимка шыбитны колӧ сӧмын недӧимкасӧ мынтыны вермытӧм йылысь акт серті, кодӧс гижлӧмаӧсь недӧимкасӧ мынтытӧмысь мырдӧн перйыны заводитлігӧн.
СССР-са бюджет. Финанс комиссариат лӧсьӧдӧм серти (правительствоӧн абу на вынсьӧдӧма) тавося государствоса бюджет (прикод-рӧскод) СССР-лӧн 4.760 миллион шайт: колян во серти унджык 72 миллион да 100 сюрс шайтӧн.
Миян обласьтувса бюджет. Коми обласьтувса бюджет таво кежлӧ лӧсьӧдӧма 3.579.274 шайт мында, колян воын лӧсьӧдлӧм бюджет серти унджык 448.274 шайтӧн. Обласьт пасьта быд душ вылӧ воӧ 17 шайтӧн.
