СЁРНИЯС КООПЕРАТИВСА СОБРАННЬӦ ВЫЛЫН
Январ тӧлысьын кооперативса правленньӧяс кутасны висьтавлыны собранньӧяс вылын асланыс куим тӧлысся удж йывсьыс. Уна сюрс ньӧбасьысь-босьтасьысь йӧз ас кооперативын кӧзяин кывйӧн шуасны бӧрйӧм йӧзлы кыдзи водзӧ удж нуны, тӧвар дон лэдзны.
Медвойдӧр колӧ, мед собранньӧӧдз ревизуйтысь комиссия гӧгӧрбок учёт вӧчас, колян уджсӧ да тшӧтпуктӧмъяссӧ видлалас, лючки, гӧгӧрвоана висьталас шленъяслы, кыті мый бура, кыті омӧля уджыс мунӧма.
Унджыкысьсӧ пайщикъяс миян омӧля сёрни нуӧны, шуасны: мый уджалӧмаӧсь пӧ тай, уджалӧмаӧсь-а, мый сэсся, — дай пом. Тадзи оз ков шуны. Пайщикъясыд кӧ омӧльӧсь да узьысьӧсь, став кооперативыд омӧль да узьысь. Пайщикъясыд кӧ сюсьӧсь да кӧзяинӧн асьсӧ кутӧны, кооперативыд надейнӧ ён, быдтор эм да быдтор донтӧм. Сё пиысь ӧкмысдас ӧкмысысьсӧ тадзи овлӧ.
МЫЙ ЮАСЬНЫ КООПЕРАТИВСА СОБРАННЬӦ ВЫЛЫН.
Юасьны унатор, дерт, позяс, ставсӧ тані он висьтав. Кыввидзӧмсӧ бара жӧ колӧ тӧдны, бурлань али омӧльлань сійӧ кооперация ёнмӧдӧм боксяньыс мунӧ.
ШЛЕНЪЯС ЙЫЛЫСЬ:
1. Кымын морт куим тӧлысьӧн шленӧ пырӧма. Кымын петӧма. Мый понда. Кутшӧм сиктысь этша шленыс. Кутшӧм ногӧн правленньӧыс заводитліс пыртны шленӧ. Уна-ӧ став шлен пытшсьыс гӧль да оланаджык йӧз. Мый вӧчӧма, мед вермасны шленӧ пырны гӧль йӧз да нывбабаяс. Ставыс абу шленынӧсь партийнӧйяс, комсомолецъяс, служакъяс.
2. Кымын шлен мынтӧма тыр пайсӧ вит шайтӧдз, устав серти. Кутшӧм удж да сёрни вӧлӧма правленньӧлӧн пай чукӧртӧм йылысь.
ТӦРГУЙТӦМ ЙЫЛЫСЬ
1. Кутшӧмкӧ водзвыв пуктӧм план серти уджыс муніс али, кор мый ковмис, сыла и мунісны босьтасьны. Мыйла кооператив Обсоюзысь оз босьтась. Кытысь меддонтӧм да лада тӧвар вайны. Мый вӧчӧма омӧль да дурк тӧваръяс вайӧмысь. Мыйяс босьталӧны частнӧй купечлысь.
2. Кыдзи да мыйта тӧвар ас дон вылас содтӧдсӧ пуктӧны. Эм абу портитчӧм тӧвар да мый вӧсна сійӧ.
3. Мыйла некутшӧм кокньӧд (льгота) абу босьтасигӧн шленъяслы. Мый дон шленъяслы вузалӧма. Мый понда уджӧн ӧнӧдз на сеталӧны. Коді сэні мыжа. Мыйла правленньӧ оз мыжды уджйӧз мынтыны вермана йӧзӧс. Коді мыйта уджйӧза.
4. Эм абу судзсьытӧмъяс прикащиклӧн, казначейлӧн. Мый понда. Быдтор-ӧ лад вылӧ пуктӧма, мед лотайтӧм оз ло водзӧ кежлӧ.
5. Мый вылӧ да уна-ӧ видзӧма правленньӧ сьӧм. Кымын ур быд вузалӧм шайт вылӧ рӧскодыс кайӧ. Чинӧ али содӧ рӧскодыс.
6. Кутшӧм тӧвар вылӧ уна-ӧ содтӧны да мыйӧн вузалӧны кад серти. Эм абу брак — куйлан тӧвар.
СЬӦМ КАПИТАЛ ЙЫЛЫСЬ.
7. Мыйта сьӧмӧн кооператив бергӧдчӧ. Уна-ӧ аслас капитал да уна-ӧ йӧзлӧн. Коді, дыр-ӧ кежлӧ да донӧн-ӧ удждӧ сьӧм.
8. Уна-ӧ лоӧ мынтыны йӧз капиталысь да мыйта донсьӧдӧ сійӧ тӧварсӧ. Позьӧ оз сійӧс ас вӧлӧсьтысь быд керкаысь шленӧ пырӧмын дай пай мынтӧмӧн чинтыны.
9. Эм абу лишнӧй кӧлуй, тӧргуйтан дозмук.
10. Овлӧ оз да мый понда: вексель серти он вермыв мынтыны. Мый сэки керны.
МУКӦД СИКАС ЮАСЬӦМ.
11. Тшӧкыда-ӧ овлӧны собранньӧяс правленньӧлӧн. Мый понда сійӧ ылі деревняясӧ оз волы висьтавны ас удж йывсьыс. Овлӧ оз собранньӧяс ӧтув вӧлӧсьтувса учрежденньӧяскӧд.
12. Индалӧ да отсалӧ оз удж нуӧдны партия ячейка. Кутшӧм удж мунӧ кооператив бердӧ сибӧдӧм йылысь да йӧзӧс югдӧдӧм йылысь. Нывбабалы да том йӧзлы кооператив йылысь коркӧ вӧвлі эз вӧчлӧма собранньӧ.
13. Эм абу кутшӧмкӧ ӧтув удж нуӧдӧм мукӧд сикас кооперативъяскӧд.
