КАРТА ВЫЛАД КОЛӦ ЛӦСЬӦДНЫ БУР ЛЯСНИ

Миян крестьяна мӧскыслы тӧвбыдӧн шӧркоддьӧма лэдзӧны картааныс турунтӧ додь кӧкъямыс кымын. Ставыс ӧмӧй сійӧ сюрӧ мӧслы вомас? Оз. Кодлӧн картаас абу лӧсьӧдӧма вердчыны лясни, мӧскыс тӧвбыдӧн этша-этшапырысь нин талялас — вӧчас куйӧдӧ доддьӧн-джынйӧн либӧ кык додь турунтӧ. А лясниыд картаясын шочлӧн на эм. Кӧть шочиниклӧн и эм, сэтшӧм лясниыд оз туй.

Юалан кӧ крестьянинлысь, мыйла сылӧн картаас абу лясниыс, шуас вочакыв: куйӧдыс пӧ ӧд колӧ жӧ, мед пӧ талялас, сійӧ оз вош. Колӧ эськӧ, дерт, куйӧдыд да, сӧмын ӧд турун талялӧмнад крестьяниныд воӧ убыткаӧ. Нёль душ скӧт тӧвбыдӧн ляснитӧг вердігӧн таляласны додь 6–8 турун. Сэтысь артмас, шуам, додь дас вит куйӧд. Тулысын сы местаӧ турунтӧ лоӧ ньӧбны да сетны шайт 60–80. Лыддьыны кӧ кутан, донӧн жӧ тальӧдӧм турунсьыд куйӧдыд сувтӧ — 4–5 шайтӧн додь.

Вӧлі кӧ эськӧ лясниыд бурджык 3–4 душ скӧтлы, позис сэки тальӧдӧм турун вылад дзонь мӧс матӧ содтыны тӧвйӧднытӧ. Сэки эськӧ сійӧ мӧскыслӧн куйӧдыс, турунтӧ тальӧдӧм серти ёна этшаыс эз ло.

Лясни колӧ вӧчны тані картина вылын индӧм кодьӧс. Татшӧм лясниясысь турун ньӧти оз киськась.