* * *

Гортдорса льӧм пуыс косьмыны кутіс да,
Сиктсаяс шуисны: «Регыд пӧ, регыд...»
Туруныс чӧвтсьӧма, стын помас
Прӧста нин сулалӧ сімыштӧм лэбын.
Пывсянсьыс кайигӧн, беддя кӧть,
Куимысь шойччӧ,
Кӧть эськӧ пывсянсӧ сувтӧдліс неважӧн
Керкакӧд орччӧн.
Керкаыс том зон моз сулалӧ,
Крепыд да статя,
Сӧмын тай некодлы мыччыны керкаас
Батьныслы ватор.
Пуяссӧ садитліс, челядьыс ичӧт на вӧлі,
Мед кӧть нин корсюрӧ юмолыс воманыс
волас.
Поштаысь воисны, челядьсянь письмӧ пӧ
воӧм:
«Батьӧ, ми тэ дінӧ выль гожӧм быть вылӧ
волам,
Таво тай, кыдзкӧ да мыйкӧ да,
Бара эг эштӧй...»
Медбӧръя чалльыслӧн петӧма лолыс.
Эштіс.