КЫДЗИ ЛӦСЬӦДНЫ КООПЕРАЦИЯ ВЕЛӦДАН КРУЖОК
Кытӧні позяс лӧсьӧдны кружок?
Кооперация велӧдан, сылысь уджъяссӧ тӧдмалан кружок колӧ лӧсьӧдны сэтшӧм вӧлӧсьтъясын, кӧні эмӧсь бура лӧсьыда уджалысь партия да комсомол ячейкаяс, бура уджалысь кооператив да лыддьысян керка. Сӧмын сэні ми вермам аддзыны кружокын удж нуӧдны кужысь мортӧс, кооперация йылысь бура тӧдысьӧс. Сӧмын сэтшӧм вӧлӧсьтъясын ми вермам надейтчыны — кружок оз падмы, оз косьмы, оз нем виччысьтӧг друг кув.
Кодлы колӧ шыасьны кружок лӧсьӧдӧм вӧсна?
Водзмӧстчыны, шыасьны кружок лӧсьӧдӧм могысь да кружокын удж нуӧдысьӧс бӧрйӧм могысь колӧ кооператив Правленньӧӧ бӧрйӧм войтырлы. Дерт, бурджык, кооперация велӧдан уджъяс йылысь тӧждысьӧмсӧ кӧ сетӧма вӧлі правленньӧса ӧти мортлы, шуам щӧт тӧдысьлы либӧ кодлыкӧ мӧдлы. Кооперация велӧдӧм йылысь тӧждысьысь ёртлы ковмас пырны волполитпросветкомӧ кооперативсянь представитель пыдди дай уджавны сэні зільджыка.
Мый ковмас вӧчны кооперация велӧдӧм йылысь тӧждысьысь ёртлы?
Сылы лоӧ ёна тӧждысьны да зільны, медым волполитпросветком эз эськӧ вунӧд кооперация велӧдан удж нуӧдӧм йылысь; медым сійӧ уджсӧ сюйис эськӧ тшӧтш аслас колан уджъяс пӧвстӧ (аслас планӧ) да лючки нуӧдіс; медым отсаліс кооперациялы лыддьысян керка бердӧ кружоксӧ лӧсьӧдны, удж нуӧдысьсӧ сійӧ кружокас корсьны; медым эськӧ волполитпросветком быд ногыс отсалас лыддьысян керка бердӧ бурджык кооператив пельӧс да кооперация йылысь лыддьысянін лӧсьӧдны, да мукӧдтор.
Кыдзи чукӧртны кружокӧ войтырӧс?
Войтырӧс кружокӧ чукӧртӧм могысь колӧ не ӧтчыд чукӧстчывны йӧз бердӧ, корны, кыскыны зільысь йӧзӧс, медым найӧ пырасны кооперация велӧдан кружокӧ. Колӧ гоз-мӧдысь чукӧртлыны лыддьысян керкаӧ йӧзсӧ да висьтавлыны налы мыйла колӧ велӧдчыны кооперация йылысь да тӧдмавны сылысь уджъяссӧ, кутшӧм бур вермас лоны тайӧ велӧдчӧмысь, сідзи водзӧ.
Чукӧрмас кӧ кружокӧ морт 10–15 и, тырмас, унджыкыс ов и ков, мед оз ло сьӧкыд удж нуӧдысьлы.
Кодлы колӧ пырны кружокӧ?
Медся ёна кружокӧ пырны колӧ кооператив бердын уджалысь войтырлы, лавка комиссияын уджалысь йӧзлы, водзмӧстчысь пайщикъяслы, комсомоллы да делегаткаяслы. Позяс пырны кружокӧ и мукӧдлы, медым сӧмын эз вӧвны 16 арӧсысь томджыкӧсь.
Кутшӧм программа серти нуӧдны кружокын велӧдчан удж.
Программа вермас лоны со кутшӧм: 1) Мыйӧн олӧ крестьянин. 2) Кооперация да сылӧн уджъясыс. 3) Кыдзи панӧма да уджалӧ сиктса кооператив. 4) Кутшӧм отсӧг сетӧ кооператив крестьяналы (вузасьӧм, ньӧбасьӧм, тӧвар сикас да налӧн донъясыс). 5) Сьӧмъяс (средства) кооперативлӧн. 6) Кыдзи веськӧдлӧны, нуӧдӧны уджъяссӧ кооперативын (тані колӧ ветлыны кружоклы чукӧрӧн кооперативӧ, видзӧдлыны сэтысь тӧваръяс да тшӧтоводнӧй нигаяс, видзӧдлыны кыдзи мунӧ сэні уджыс). 7) Кутшӧм права сетӧ кооперация шленъяслы да кутшӧм уджъяс найяслы колӧ вӧчны. 8) Кыдзи уджалӧ кооперация Союз пасьта. 9) Кыдзи сійӧ водзсасьӧ-вермасьӧ частнӧй тӧргуйтӧмкӧд. 10) Кыдзи кооперация ӧтувтӧ уджалысь йӧзӧс сиктъясын. 11) Кооперация да выль нога олӧм. 12) Кооперация да социализм.
Дерт, позяс, ковмас кӧ, тайӧ программатӧ содтыны да чинтыны, кыдзи кытӧні лоӧ лӧсьыдджык.
Тайӧ программа серти колан нигаяс миян корӧма нин Центросоюзысь.
Кутшӧм кооперативлы ковмасны нигаяс, колӧ гижны сы йылысь Обсоюзӧ.
